DAKBAYAN SA DAVAO—- Gimando sa Office of the Ombudsman ang pagpasaka og kasong graft batok kang kanhi health secretary Francisco Duque III ug kanhi Department of Budget and Management Procurement Service (PS-DBM) executive director Lloyd Christopher Lao.
Ang kaso batok ni Duque ug Lao dunay kalambigitan sa giingong mga iregularidad sa pagbalhin sa pondo sa Department of Health nga balor P41.46 bilyones ngadto sa PS-DBM Â niadtong tuig 2020 panahon sa COVID-19 pandemic.
Sa 49 ka pahina nga resolusyon nga pinetsahan Mayo 6 nga giaprobahan ni Ombudsman Samuel Martires niadtong Mayo 8, ang anti-graft agency nagkanayon nga dunay basehan aron pasakaan og kaso sa korte si Duque ug Lao tungod sa paglapas sa Section 3 (e) sa Republic Act 3019 o ang Anti -Graft and Corrupt Practices Act.
Nagkunsaba matud pa si Duque ug Lao aron mabalhin ang pondo bisan walay Memorandum of Agreement kabahin sa nahisgutang katuyuan.
Ang Seksyon 3 (e) sa RA 3019 nagdili sa mga opisyal sa publiko sa paghatag og dili angay nga benepisyo, bentaha o pagpalabi sa usa ka pribadong partido o sa paghimo sa bisan unsang partido, lakip ang gobyerno, nga dili angay nga kadaot.
Sa laing bahin, sa managlahing desisyon nga giaprobahan usab ni Martires niadtong Mayo 8, ang ombudsman nihukom nga sila si Duque ug Lao sad-an sa administrative offenses nga grave misconduct ug conduct prejudicial to the best interest of the service, nga may kalambigitan gihapon sa P41.46-bilyones nga pundo. pagbalhin.
Si Duque ug Lao gipahamtangan og silot nga pagtangtang sa serbisyo, apan tungod kay wala na silay koneksyon sa DOH ug PS-DBM, gimandu sa nga mobayad sila og multa nga mokantidad sa ilang suweldo sulod sa usa ka tuig.
Gimando usab sa ombudsman ang pagpugong sa tanan nilang retirement benefits ug kanunay nga pagdili nga manerbisyo sa gobyerno.
Ang imbestigasyon sa ombudsman kang Duque, Lao ug sa ubang mga opisyal sa DOH naggumikan sa 2020 Commission on Audit (COA) report ug sa reklamo nga gisang-at ni Sen. Risa Hontiveros ug kanhi senador Richard Gordon niadtong 2022 human sa mga buwan sa pagdungog sa Senate Blue Ribbon committee.
Sa imbistigasyon sa Senado migawas nga si Duque ug Lao naghimo og paagi nga mabalhin ang pondo sa DOH paingon sa buhatan ni Lao aron sa pagpalit og mga medisina kabahin sa pagkontra sa Covid-19.
Apan, matud pa sa abigado ni Duque nga Yorac Law Firm, ilang ikwestyon ang desisyon sa Ombudsman.
Kahinumduman nga ang Pharmally Pharmaceutical Corporation maoy nakakuha sa kontrata.
UNa pa man niini, gipamatud-an sa Office of the Ombudsman ang ilang resolusyon nga nagrekomendar sa pagpasaka og kasong graft batok sa mga opisyal nga nalambigit sa kagubot sa Pharmally Pharmaceutical Corporation.
Sa kamandoan nga pinetsahan og Mayo 3, apan gipagawas lang niadtong Huwebes, Mayo 9, gibalibaran sa Ombudsman ang supplemental motion for reconsideration nga gisang-at ni kanhi Procurement Service-Department of Budget and Management (PS-DBM) undersecretary Lloyd Christopher Lao. Gawas sa pag-dismiss sa iyang apila, gi-otrousab sa Ombudsman ang mando sa pag-akusar niini ug gilakip si Lin Weixiong.
Si Lin Weixiong ang bana ni Rose Nono Lin. Usa sa mga personalidad sa negosyo nga nalambigit sa kagubot sa Pharmally.
