DAKBAYAN SA DAVAO— Kapin 1,800 ka indibidual didto sa Assam, sa Northeastern India, ang gipang-aresto tungod kay nakigminyo og mga menor de edad, kini ang gisaysay ni Chief Minister Himanta Biswa Sarma, niadtong Biernes, Pebrero 3, 2023.
Sumala ni Sarma, nakadesisyon ang gobierno nga gukdon ang mga indibidual nga nakigminyo og mga babaye nga nagpangindaron og ubos sa 18-anyos sa paningkamot nga maundang na ang mga kaminyoun nga milambigit sa mga babaye nga menor de edad.
Sa tweet ni Sarma, iyang gisaysay nga gikinahanglan na nga moaksyon ang gobierno sa mga dili makatarunganon nga kaminyoun sa mga dalagita tungod kay usa kini ka krimen ug paglapas sa balaud, ug kinahanglan na nga undangon.
Sulod sa milabayng siyam (9) ka adlaw mitala ang gobierno og 4,000 ka mga kaminyoun ang milambigit sa mga menor de edad.
Ang mga Hindu nga pari ug Muslim clerics apilon sa imbistigasyon kay sila ang nagpasi-ugda sa seremonya.
Ang mga nagpakasal sa mga babayeng nagpangidaron og 14-anyos kasuhan ubos sa Protection of Children from Sexual Offences Act, samtang ang nagpakasal sa nagpangedaron ug lampas katorse hangtud 18-anyos kasuhan sa paglapas sa Prohibition of Child Marriage Act.
Sa survey nag gihimo sa gobierno niadtong tuig 2019, 32porsyento sa mga babaye sa Assam, nangaminyo una pa sila nagpangidaron og 18-anyos ug 12-porsyento kanila ang nanganak .
Samtang didto sa eastern section sa West Bengal, 41.6 porsyento ang nangaminyo nga menor de edad.
Ang “child marriages ” kon sayong pagminyo sa mga dalagita, nahimo ng normal nga sitwasyon sa Assam,” sumala ni Rajib Sharma, ang hepe sa Global Organization for Life Development, usa ka nongovernment organization.
Sumala sa mga opisyal, ang mga miemrbo sa tribu nagahatag og pagtugot nga ang ilang mga dalagita mominyo tungod sa kalisod ug sa kakulangon sa tabang sa gobierno kanila..
