DAVAO CITY — Ang Davao City Police Office (DCPO) mipasaka na og kaso batok sa kapin
960 ka mga tawo nga nakalapas sa mga lagda sa kwarentina sukad nga gipatuman ang
Enhanced Community Quarantine sa dakbayan niadtong bulan sa Marso.
Si City Police director Col. Kirby John Kraft mibutyag nga 1,320 na ka mga
indibidwal ang nadakpan sa DCPO nga nakasupak sa mga lagda sa ECQ ug 966 na
kanila ang napasakaan og kaso sa korte.
Matud pa ni Kraft nga sukad niadtong Marso 15, 1,045 na ka mga tawo ang nasikop sa
paglapas sa curfew, 151 tungod sa liquor ban, ug 124 ang nakalapas sa patakaran sa
social distancing ug mass gathering.
Karong panahon sa krisis tungod sa coronavirus disease (Covid-19), ang DCPO
nagpahigayon usab og mga operasyon batok hoarding, overpricing, ug profiteering.
Sa 14 ka operasyon nga ilang nahimo, ang DCPO nakasakmit og mga alcohol, face
masks, thermal scanners, disenfectants, ug mga liquid soap nga gipamaligya sa sobra
ka mahal nga presyo.
Ang Davao City Government padayong nag-awhag sa mga Dabawenyo nga mosumbong sa
ilang mga nakit-ang kalapasan sa ECQ ngadto sa mga otoridad o pinaagi sa Covid-19 Operations Center.
Ang hotline sa Covid-19 Operations Center bukas 24/7. Mahimo silang matawagan sa
0917 508 6548 ug 0919 071 1111, ug padad-an og text sa 0906 367 4671 ug
0939 340 5675. Pwede usab silang padad-an og email sa covidtf@davaocity.gov.ph.
Sa laing bahin, ang DCPO mahimong makontak pinaagi sa ilang “isumbong Mo Kay CD” hotline sa 0925 823 3276. (LBG)
