DAKBAYAN SA ILIGAN (Hunyo 21) — Misurender Kahapon sa kapulisan ang barangay kapitan nga adunay ‘warrant’ of arrest sa kasong pagpanglugos sa usa niya ka empleyada.
Misurender si Joel Jumawan, barangay kapitan sa San Miguel, sa dihang iyang nahibal-ang mogawas na ang warrant of arrest batok kaniya gikan sa Lanao del Norte Regional Trial Court Branch 1.
Gipasakahan ug kasong pagpanglugos si Jumawan sa usa ka 43 anyos nga tigpanilhig sa park.
Sumala pa, ang pagpanglugos nahitabo niadtong 2017, apan gipasaka ang reklamo batok kaniya pagkahuman sa Barangay elections niadtong 2018.
Sa pakihinabi kaniya, nagbutyag si Jumawan nga nagtuo sya nga nadismis na ang kaso batok kaniya, “Apan sa dihang akong nahibaw-an nga naa koy warrant, misurender ko dayon,” saysay sa kapitan.
Miadto si Jumawan sa istasyon sa kapulisan sa Iligan ug boluntaryo nga misurender.-Divina M. Suson/NewsLine.ph
