Kaso sa SAF 44 napagan sa away sa dagkung opisyal sa Korte Suprema

DAKBAYAN SA DABAW, Mindanao — Kinsa may angayan pakasad-on sa pagkadelatar sa pagbista sa kaso sa pagkamatay ka kuarentay kuatro nga membro sa Philippine National Police Special Action Force (PNP-SAF)?

Samtang ang pamilya nagdali nga mahatagan ug hustisya ang kamatayon sa ilang minahal sa kinabuhi, nadiskobrehan nga ang away sa dagkung opsiyal sa korte Suprema , ang nakapalangay sa kaso.

Sumala pa sa tigpamaba sa Korte Suprema nga si Teodore Te, wala gi-aksyunan sa Buhatan ni   Supreme Court  Administrator Jose  Midas Marquez, ang apilar sa pamilya sa SAF 44 nga didto sa Manila itaral ang kaso sa 88 ka suspetsado nga nalambigit sa kamatayon sa SAF 44 .

Si Marquez ang administrador sa Korte Suprema.

Ang mga palusot nabutyag sa dihang mipagawas ug sulat pamahayag si Justice Secretary Aguirre niadtong Enero 25, 2018, atol sa ikatulong anibersaryo sa kamatayon sa SAF 44, nga sulod sa usa ka tuig wala gyud gihatagan og aksyon sa Korte Suprema ang ilang hangyo.

Matud pa ni Aguirre, nagsige sila ug subay ug unsa na ang nahitabo sa ilang hangyo, apan walay insaktong tubag nga nahatag kanila ang taga Korte Suprema,.

Misaysay si Aguirre, nga gilingkuran ug gipasagdan lang ni Chief Justice Maria Lourdes Sereno sa kapin usa ka tuig ang ilang hangyo.

Apan, sumala ni Te, nga didto natanggong ang dokumento sa buhatan ni Marquez..

Midungag si Te, “Subay sa among proseso, ang hangyo nga gikan sa “Lower Courts”, i-indosar ni Chief Justice Sereno ang dokumento buhatan ni Marquez.”

Gani, matud pa ni Te, giduso ni Sereno ang dokumento sa Buhatan niadtong Pebrero 9, 2017 ug niadtong Pebrero 14, 2017, nadawat kini sa maong buhatan.”

Si Aguirre nagbutyag nga gisubay sa prosecutor general ang ilang hangyo niadtong Desyembre 5, 2017 .

Ug kaniadtong Biernes, Enero 25, 2018, matud pa ni Te, giduso na ni Maquez ang dokumento paingon sa “ Clerk of Court En Banc’ .

Gani matud pa ni Te, nadawat sa “en banc” ang apilar mga alas 2:00 sa hapon, pipila ka oras human mipagawas ug sulat pamahayag si Aguirre.

Sa dihang gipangutana si Marquez nganong iyang gilingkuran ang papeles, igo ra kini miingon “Gisunod ra man namu ang patakaran nga magkuha mi ug mga komentaryo sa mga hurado ug uban pang indibidual nga dunay kalabutan sa kaso, pagkahuman ana, istudyuhan sa Legal Office. Dugay na nga proseso, labi na nga ang mga hurado ug ang mga apil sa kaso taga Mindanao.”

Ang away tali ni Marquez ug Sereno ang nabutyag didto sa Kongresso atol sa hearing sa pagpalagpot kang Sereno.

Tungod sa away sa sulod, natingala nalang ang pamilya sa SAF 44 nga nauna pa ug gawas ang resolusyon sa pagbalhin sa pagtaral sa kaso sa mga Maute gikan Manila paingon sa Dakbayan sa Cagayan de Oro.

Apan, gipedensahan ni Te si Sereno, matud pa niya, wala na gihulat ni Sereno ang rekomendasyon sa buhatan ni Marquez, sa iyang pagdesisyon nga ibalhin sa Cagayan ang kaso sa Maute.

Si Sereno ra gani kuno ang nagdesisyon nga pagbalhin ang pagtaral sa kaso sa Maute didto sa korte sa Cagayan, gibaliwala usab ni Sereno ang rekomendasyon ni Marquez nga sa Taguig City nalang itaral ang kaso, basi sa hangyo ni Aguirre.

Una nang nagbikil si Sereno ug Marquez kabahin sa isyu nga paghatag ug mga benepiso alang sa mga trabahador sa Korte Suprema.

Gani gibasol ni Marquez ang mga bata-bata ni Sereno tungod sa kadugay sa pag relis.

Mahinuduman ang giakusahan ni Justice Noel Tijam si Sereno nga bakakon sa iyang pagbout-bout ug desisyon sa kaso sa pagabalhin sa Maute.

Ang sulat pahayag ni Te, iyang gi-duta-an si Marquez “Ang kaso sa Maute gi-diritso ni Sereno sa “Court En banc, samtang ang kaso sa Mamasapano gi-agi pa sa buhatan ni Marquez.”-Editha Z. Caduaya/Newsline.ph