DAKBAYAN SA OZAMIZ— Mipasalig si Mayor Sancho Fernando Oaminal ning lungsod nga dili angayang mabalaka ang katawhan tungod kay ang pasyente nga nagpositibo sa Coronavirus-19 anaa lang sa isolation facility ug wala kini nakahimamat ug tawo.
Kini ang gipasalig Oaminal sa katawhan, human niya nahibaw-an nga daghan ang nabalaka nga mga Ozamiznon tungod kay dunay nagpositibo sa Covid-19.
“Wala nakasuroy sa syudad ang pasyente, ug wala kini maka uli sa ilang paninalay, ” pamulong sa Mayor.
Dugang niya “Ang maong pasyente usa ka returning resident nga midangat sa Ozamiz sakay sa barko nga gidawat sa pantalan sa Ozamiz. Human sa pag rapid test niini, gidala gilayon sa provincial isolation facility sanglit positive ang result niini sa rapid test busa siya gi swab test aron maseguro ang iyang kahimtang .”
Gumikan sa maong sitwasyon wala kini kontak sa mga tawo sa Ozamiz sa iyang paghidangat busa walay angayang kabalak-an.
Nasayran nga adunay pipila ang nabalaka gumikan sa maong sitwasyon, apan gipaniguro sa Mayor nga walay angayang kabalak-an, hinuon mintinahon ang pagka disiplinado sa kaugalingon, magbantay kanunay ug sundon ang mga health protocols sama sa pag sul-ob sa face mask, pag hugas sa kamot gamit ang tubig, ug sabon o kaha alcohol ug pag observe kanunay sa social distancing.-Thata Roxas
