DAKBAYAN SA TAGBILARAN, Pilipinas — Usa ka suspetsadong kawatan ug motor nadakpan sa kapulisan sa Loboc, Bohol, niadtong Biernes, Pebrero 2, 2018.
Ang suspetsdo giila sa kapulisan nga si James Cajes. 25 anyos ug mulupyo sa barangay Guinobatan sa lungsod sa Trinidad.
Sumala sa report sa kapulisan, nangawat ug motor si Cajes didto sa lungsod sa Carmen ug iya kining gidala sa Loboc aron ibaligya.
Ang pagdakop kang Cajes gipatuman human nakadawat ang kapulisan sa Loboc ug taho nga adunay usa ka kadudahang tawo nga namaligya og usa ka Suzuki Smash 110 kolor pula nga walay plate number.
Natingala kuno ang iyang gihanyagan sa motor nganong gibaligya ug P10, 000.00 ang motor.
Walay gikapakita nga Certificate of Registration ug Official Receipt si Cajes.
Giadtoan gilayon sa ginsakpan sa Loboc PNP pinangoluhan ni Police Senior Inspector Rey Olar uban nila ni SPO1 Antonio Gujelde Jr., PO3 Miguel Centinales ug PO1 Roel Mangaya-ay ang maong lugar partikular na sa Totong’s Motorshop. Ug gihimo gilayon ang entrapment operation batok kang Cajes.
Sumala sa report sa Loboc PNP, Ila gilayon gitawagan ang Talibon Police Station ug didto nasayran nga ang motor gipanag-iyahan sa usa ka Jovencio Trazo, taga barangay San Isidro, lungsod sa Talibon.
Nakit-an sa kapulisan ang mortgage receipt sa U-box sa motor.
Ang motor gikarnap ni Cajes niadtong Enero 31, 2018.
Gisikop ang maong suspek ug gibalhog sa karsel sa Loboc PNP. -Alan Andy Nazaro Dalagan/Newsline.ph
