DAKBAYAN SA DABAW — Gi-aprobahan na sa 19th City Council ning dakbayan niadtong Martes Hunyo 23, ang usa ka resolusyon nga misuporta sa laraw sa nasyonal nga panggamhanan nga tugutan na nga dunay back-ride ang motor ug dili lang ang pamilya niini, lakip na ang publiko.
Ang resolusyon giduso ni Konsehal Danilo Dayanghirang atol sa regular nga sesyon kahapon og gisurpotahan sa tibouk konseho.
“Sa nasyonal nga plano, bana ug asawa o pamilya lang ang makasakay, pero sa among gipasa nga resolusyon, tugutan sab nga makasakay ang publiko, kay aron matubag ang problema sa transportasyon,” gisaysay ni Dayanghirang sa pakighinabi sa Newsline.
Una niini, giparepaso na sa Inter-Agency Task Force on Emergency Infectious Disease (IATF-EID) ang Department of Transportation (DOTR) ug uban pang ahensya nga tag-awon ang posibilidad nga tugutan ang mga motor nga dunay back-ride basta membro lang sa pamilya ang mosakay ug usa ra sila ka balay sa driver.
Sa resolusyon nga gi-aprobahan sa konseho, ilang giduso nga tugutan ang back-ride sa mga motorsiklo, dili lang sa mga myembro sa pamilya o sa asawa apan apil na ang ubang pasahero nga dili makasakay sa regular nga transportasyon.
Matud ni Dayanghirang ang pagtugot sa motor nga maka back-ride usa ka pamaagi aron masulbad ang kalisud sa transportation nga nasinati sa mga nagkalain laing individual tungod sa GCQ ug MGCQ.
Apan, sa balaud sa Land Transportation Office (LTO) wala gitugutan ang mga motor kon habalhabal nga mamasahero tungod kay basi sa iyang desinyo ug kapasidad usa ra gayud ka tawo ang puede moaangkas niini ug ang driver.-Newsline
