DAKBAYAN SA DABAW (Septembre 4) — Daghang mga drayber sa pang-publikong sakyanan dinhi ang nangahadluk human ilang gi-widro ug gipamalengke ang singko mil pesos (P5,000) nga sulod sa ilang Pantawid Pasada cash, imbis nga ibayad sa ilang krudo.
Namatikdan sa Land Transportation Franchising Regulatory Board -11 (LTFRB -11) nga ubay-ubay ka mga operator ang nanikas-ilang gikuha ang cash nga sulod sa sa ilang ATM ug wala nila gihatag sa ilang drayber ang card.
Sa tulo ka kaso nga nahibaw-an sa NewsLine, ang mga asawa sa operator ang midali-dali ug adto sa Landbank ATM machine ug ilang gilimas ang unod sa ATM, bisan pa man sayud sila nga gidili kini.
Ang matag Pantawid Cash card adunay sulod nga P5,000 alang sa usa ka tuig nga ayuda sa goberno alang sa mga tsuper.
Apan ang mga tikasan nga operator, imbis nga ipatubil ang sulod sa pantawid Cash Card ilang gi-widro ang kuarta og gipamalengke.
Matud pa sa usa ka opisyal sa LTFRB, nagpahibalo kanila ang LandBank nga dunay mga operator nga nag-widro sa kuarta.
Tungod niini, nagwarning ang LTFRB nga basin dili na sudlan ug kuarta ang ilang card tungod sa maong pag-abuso.
Niadtong miaging semana, gipang-apud-apod na ni LTFRB Chairman Martin Delgra ang Pantawid Pasada cash cards sa mga operator dinhi sa dakbayan.
Mokabat sa 4,463 ka kard ang girelis sa mga operator sa PUJ.
Gipasabot ni Delgra nga ang mga tag-iya sa jeep ang modawat sa kard, kay sila man ang naggunit sa prangkesa, apan kinahanglan nga ihatag sab nila kini sa ilang mga drayber.
“Kaning inyong cash card gamiton lang gyud ninyo ni nga bayad sa gasolinahan, apan, dili kini puede gamiton sa ubang katuyuan,” pasabot ni Delgra.-Harold V. Pontongan/NewsLine.ph
