BANSALAN, Davao del Sur (Enero 1, 2026)– – Nadiskubrehan na lang ni alyas “Benita” nga wala nay kinabuhi ang iyahang 50 anyos nga silingan sa Purok 6, Lower Mantalaki, Barangay Darapuay, Bansalan, Davao del Sur nga nagkulob sa dalan bandang alas 9:30, Miyerkules sa buntag, Disyembre 31, 2025.
Dihang girespondihan ug giimbestigahan sa kapulisan ang lugar nasayran niini nga nakuryentehan kini nga makita ang marka sa kamot sa biktima nga giila sa mga pulis nga si Danilo Mesa Santaromana, laborer ug residente sa nahisgutang lugar ang daw napaso sa iyang panit.
Sumala sa mga silingan niini, ilado sa lugar ang biktima nga naga-inum og ilimnong makahubog ug gireport nga nagapangita pa og ilimnon hilabi na og gabii kung makulangan.
Nasubay sa mga pulis nga nagunitan sa biktima ang linya sa kuryente sa lugar kung asa nadiskubrehan ang patay nga lawas niini ug walay nasubay nga foul play ang kapulisan sa patay nga lawas niini.
