DAKBAYAN SA DABAW (Disyembre 2) — Patay na sa dihang nadiskubrehan ang babayeng guardiya alas 7:00 sa buntag kagahapon, didto sa sulod sa iyang gitrabahuan sa Aydilnan Trading/Surplus Car Display , Greenland, Dumoy, ning syudad.
Nagbuy-od ug naligo sa iyang kaugalingong dugo si Arlene Remboran Salpa, 24, sa dihang nakaplagan ang iyang lawas, ug napuno kini ug samad dinunggaban sa nagkadaiyang parte sa iyang lawas.
Nigula sa resulta sa awtopsiya nga blunt traumatic to the head o tungod sa grabeng igo sa iyang ulo ang gikamatay ni Salpa.
Gibutyag ni  Regional Crime Laboratory Office XI Medico Legal Officer PCI Nolan Genova nga posibleng gibunalan ang ulo niini og bato sa wala pa mailhing mga suspetsado.
Adunay mga timailhang nag-antos pa ang sekyu una pa kini nakutluan sa kinabuhi.
Matud ni Genova posibleng nisukol pa ang biktima ngadto sa suspek.
Sumala ni Alvin Porgo, pintor sa maong buhatan, patay na si Salpa, ug murag tiskog na kini.
Nabungkag ang nawong sa biktima nga murag gidokduk ug gahi nga butang, sa dihang sya nakit-an.
Basi sa inisyal nga imbistigasyon sa kapulisan, mura kuno ug naay mga talimad-on nga misukol ang biktima.
Narecover sa kapulisan ang gi-isyu nga kalibre .38 nga pusil sa iyang higdaanan.
Padayon pang gi-imbistigahan ang panghitabo, ug wala pay suspek ang kapulisan ug dili pa usab klaro ang motibo sa pagpatay.-Reeya Nuñez, newsline.ph
