DAKBAYAN SA OZAMIZ (Hulyo 20) — Natusak-tusak sa igo sa bala ang usa ka lalake human kini pusila sa makadaghang higayon sa riding in tandem, Kagabii, Hulyo 19.
Ang biktima giila sa kapulisan nga si Patsilo Florida, 43, adunay live in partner ug nagpuyo sa Bagakay, Ozamiz City.
Nakaangkon og 15 ka igo sa kalibre .45 nga pistola ang biktima nga maoy hinungdan sa iyag hinanaling kamatayon.
Sumala sa imbistigasyon sa kapolisan, ang biktima nagmaneho sa iyang singol nga motor ug samtang gisubay na niini ang National Higway sa Lam-an, Ozamiz City kalit siyang gipusil sa makadaghang higayon sa wala pa mailang suspeks.
Giingong, gisundan sa suspeks ang biktima ug sa dihang nakakita kini og maayong higayon, gihimo gilayon ang pagpamusil niini.
Naka-angkon ug daghang samad pinosilan ang biktima, sa iyang tingkoy, tangkugo, ulo, bukton ug sa ubang parte sa lawas.
Daling misibat ang riding in tandem pagkahuman gihimo ang salaud.
Na recover sa crime scene ang usa ka lead ug napulo ( 10) ka basiyo sa calibre .45 nga pusil.
Padayon pa usab nga giimbestigahan sa kapolisan sa Ozamiz ang maong hitabo.
PALIHUG BASAHA: /public-school-titser-gipatay-sa-riding-in-tandem/
Sa tala sa kapulisan, Ang kaso ni Florida ang ikaduhang pagpatay dinhi nga milambigit sa riding in tandem.
Niadtong Lunas, gipusil patay ang usa ka magtutudlo.-Neptalie Batolenio/NewsLine.ph
