DAKBAYAN SA DABAW (Nobembre 5) —Usa ka lalaki nga naapil sa ‘watchlist’ sa kapulisan, gipusil, patay, alas 6:20 kagabii didto sa Kidapawan City.
Sa report sa Kidapawan City Police, nailhan ang biktima nga usa ka Juharto Ipong Paglala, 30 anyos, minyo, walay trabaho ug residente sa Barangay Kayaga, Kabacan, North Cotabato.
Sumala sa taho, gimaniho ni Paglala ang iyang multicab sakay ang iyang asawa nga si Merriam. Pag abot nila sa Quezon Boulevard, aron mopalit ug litson manok, kalit gipusil sa suspetsado si Paglala. Naigo sa ulo ang biktima nga miresulta sa iyang hinanaling kamatayon.
Sumala sa imbistigasyon sa kapulisan, nalambigit ang biktima sa illegal nga druga, ug adunay na isyu nga ‘search warant’ batok kaniya niadtong bulan sa Hulyo, sa kasamtangagang tuig.
Sa laing bahin, duha ag naangol didto sa Carmen, North Cotabato, sa dihang mibusikad ang usa ka granada sa national highway sa Purok 6, alas 7:55 kagabii.
Sa taho sa Carmen Municipal Police Station, giila ang mga nga sila si Mariel Cequina Referente, 17 anyos, estudyante ug usa ka Jaybe S. Gatila, 22 anyos, parehong molupyo sa nahisgutang munisipyo.
Sumala pa, nagkaon ang mga biktima sa NR Snack House kilid sa ‘island’ sa dihang kalit may milabay ug granada.
Gidala gilayon sa Carmen Municipal Hospital ang mga biktima. Samtang padayong gipangita sa kapulisan ang mga suspetsado ug gi-imbistigahan ang mobito sa maong insidente-Benjie Abdul Caballero/NewsLine.pn
