LUNGSOD SA OZAMIZ — Nanghatag og nagkadiyang kahimanan ( ICT/ TLE equipment ) ang lokal nga panggamhanan ning dakbayan sa 58 ka mga Elementary and High Schools nga sakop sa lungsod.
Gilangkuban kini sa mga himan nga magamit sa tulunghaan atol sa pagbukas sa klase karong Oktobre 5, 2020.
Sumala ni Mayor Sancho Fernando “ Ando” Oaminal nga kini maoy katumanan sa iyang gisaad sa nakalabayng tuig, nga ang tanang elementary schools makadawat og assistance nga 100 thousand pesos samtang 150 thousand pesos ang madawat sa Integrated / High Schools.
Lakip sa mga kahimanan nga nadawat mao ang tv, photocopier,sala set, ug refrigerator sagad sa panginahanglan sa tunghaan.
Sa kinatibuk-an, mokabat sa 6.5 million pesos ang kantidad sa tanang ICT/TLE package nga nadawat sa mga tunghaan sa Ozamiz.
Si DepEd Ozamiz City Schools Division Superintendent Jean Veloso, nagpasalamat sa Mayor sa tabang nga nadawat kay kini makatabang na sa 30-mil ka mga learners ug sa 1,600 ka mga personnel sa DepEd Ozamiz City Division.
“ Thank you so much Mayor Ando and the Ozamiz Team for your love and care for more than 30,000 learners and 1,600 personnel. DepEd Ozamiz is very blessed having you as our strongest partner”. pamahayag ni Veloso.
Sa iyang kabahin, si Ozamiz City School of Arts and Trade ( OCSAT ) School Principal Pat Rara, nagpasalamat sa LGU Ozamiz sa nadawat nga tabang alang sa pagbukas sa klase taliwala ning panahon sa pandemic sa COVId19.
“ OCSAT is forever grateful for the ICT learning package we received from ASENSO Ozamiz. This is an early blessing in the light of the COVID19 pandemic” sumala pa ni Rara.
Mapasalamaton usab si Annex Integrated School Principal Rowell Villarubia ngadto kang Oaminal kay usa sila sa mga Integrated Schools nga nakadawat sa maong tabang.
“ Thank you so much Mayor Ando. Misamis Annex Integrated School has received ICT/TLE Package worth 150,000.00” pamahayag ni Villarubia.
Nasayran nga dili lamang mga gamit sa eskwelahan ang gihatag sa LGU Ozamiz. Gipasidunggan usab sa LGU ang mga midaog sa nakakalabay nga National Schools Press Conference ( NSPC ) nga gipahigayon sa Tuguegarao City, Northern Mindanao Regional Athletic Association( NMRAA ) Meet ug sa Science Quiz .
Nakadawat og cash assistance ang tanang winners sa maong national ug regional school activities kinsa nagdala og maayong dungog sa dakbayan sa Ozamiz.
Ang pagtunol sa maong mga ayuda gipangunahan ni Konsehal Cecile Co Chairperson sa Committee on Education sa Sangguniang Panglungsod,sa ngalan sa Local nga Kagamhanan isip representante ni Mayor Ando Oaminal. -Expedita G. Roxas
