DAKBAYAN SA SURIGAO (Enero 1)— Nadakpan sa mga otoridad ang lider sa Special Partisan Unit (SPARU) sa New People’s Army (NPA), didto sa Barangay Tagcatong, Carmen, alas 4:30 sa buntag niadtong Domingo, Disyembre 30.
Sikop si Joaquin Madrinian, iladong lider sa Sparu unit sa NPA dinhi sa probinsya og nalambigit sa ubay-obay nga kaso pagpamatay, apil ang kamatayon ni Mayor Dario Otaza sa Loreto, Agusan del Sur niadtong 2015.
Sumala ni Lt. Roel Maglalang, hepe sa civil-military operations sa 23rd Infantry Brigade sa Philippine Army, nasikop sa hiniusang operasyon kuyog ang kapulisan si Madrinian.
Apan wala na nihatag ug dugang detalye si Maglalang kabahin sa pagkasikop ni Madrinian.
Nakuha usab kaniya ang kalibre .45-caliber nga pistula, granada, ug pipila ka subersibong dokumento.
Sumala ni Maglalang, daghan ug warden de aresto ug nag-atubang ug daghang kaso si Madrinian. Gani, gikonsidera siya ang ‘Most Wanted’ nga terorista sa Agusan del Norte.
Gawas sa pagpatay lang Otaza, lambigit usab kuno si Madrinian sa pagpatay sa pipila ka mga lideres sa lumad sa Caraga region, og ang pagpamanhig kang Agusan del Norte Gobernador Angel Amante-Matba niadtong 2016.
Si Lt. Col. Francisco Molina, Jr., commander sa 23IB, nagbutyag nga ang pagkasikop ni Madrinian nahitabo human misumbong sa otoridad ang mga molupyo sa lugar kung asa kini mitago.-NewsLine
