DAKBAYAN SA DAVAO — Nagsugod na og pagpangtunol og plastic nga lisensya ang Land Transportation Office (LTO) kagahapon.
Sumala ni Transportation Secretary Jaime Bautista nang apod-apod na ang LTO sa plastic-printed nga mga driver’s license, ug gisugdan kini sa LTO central office sa Quezon City.
Kini maoy unang plastic nga lisensya nga na-isyu sukad niadtong Oktubre sa miaging tuig human mipagawas ang Court of Appeals og kamanduan nga ihunong ang pag order sa mga plastic cards.
Niadtong Lunes, nadawat na sa LTO ang 1.6 milyones, o katunga sa 3.2 milyones kabouk nga plastic cards nga gipalit niini sa bidder nga Banner Plastics Card Inc., nga gihatagan og laing kontrata niadtong Martes alang sa dugang 6.5 milyones ka plastic cards.
Sumala ni Assistant Secretary Vigor Mendoza II, sa 6.5 ka milyon nga plastic cards nga napalit sa LTO, nahatud na ang 3.2 ug sarang kining makatubag sa paghulip sa 4.1 ka milyon nga kulang niadtong miaging tuig, ingon man sa pagpuno sa atong mga kinahanglanon karong tuiga.
Kahinumduman nga nahutdan og plastic nga lisensya ang LTO tungod kay gipaundang sa korte ang pagpalit niini tungod sa pipila ka mga isyu sa pag order niini. Hinungdan nga imbis plastic nga lisensya, papel lan ang itunol sa mga nagrenew ug naglukat og lisensya sa tibouk nasud sukad niadtong Oktobre 2023.
