DAKBAYAN SA DABAW (Agosto 1) –– Sikop sa Kapulisan didto sa General Santos City ang usa ka magtutudlo human niya gibaligyaan ug suspetsadong ‘shabu’ ang usa ka pulis nga nagpailang ‘buyer’ sa ilegal nga druga.
Sumala ni major Tirso Pascual, hepe sa Station 6, nadakpan ang magtutudlo nga iyang giilang si Sarifa Dumama, 35, taga Purok 4 sa Barangay Buayan, mga alas 4:20 sa hapon niadtong Martes sa dihang iyang gitunol sa usa ka pulis nga nagpailang ‘buyer’ ang usa ka pakete sa ‘shabu’ nga nagkantidad ug P500.
Si Dumama, usa ka magtutudlo sa pampublikong tulunghaan sa Gensan.
Gilusad ang usa ka entrapment operation human nakumpirma sa kapulisan ang ilang nadawat nga mga taho nga namaligya si Dumama ug ilegal nga druga.
Matud ni Pascual, si Dumama ilang pasakahan ug kasong paglapas sa sections 5 and 11 or selling and possession of dangerous drugs, under Article II of RA 9165 or the Comprehensive Dangerous Drugs Act of 2002. -CACS/NewsLine.ph
