MAKILALA, NORTH COTABATO (Agosto 28)— Gipusil patay sa gikatouhang miembro sa New People’s Army ang magtiayon nga rebel returnee niadtong Mierkules, Agosto 22, didto sa Purok 7, Barangay Sinkatulan.
Giila ni Police Chief Inspector John Rick Medel, hepe sa Makilala PNP, ang mga biktima nga sila si Felix Abaniel, 52 anyos ug iyang asawa nga si Teresita Cayanong Abaniel, 51 anyos.
Matud pa ni Medel, misaka sa balay sa biktima ang maskaradong miembro sa NPA niadtong Mierkules banda alas dies y medya (10:30) sa gabii.
Gipugos pag-abri ang ilang purtahan, dayong rikakrakan ang mga biktima.
Naigo sa ulo ug napuno sa igo sa bala ang lawas sa mga biktima, nga miresulta sa ilang hinanaling kamatayon.
Nakahipos sa kapulisan ug ubay-ubay nga basyo sa kalibre .45 nga pistola ug M16 armalite rifle sa lugar sa krimen.
Nagtuo ang kapulisan nga nanimalos ang mga rebelde tungod sa pag-surrender sa magti-ayon.-Harold V. Pontongan/NewsLine.ph
