DAKBAYAN SA KIDAPAWAN (Hunyo 20) — Nanawagan karon si Mayor Rudy Caoagdan sa lungsod sa Makilala, sa tanang motorista ug lumalabay sa iyang lungsod nga mag-amping sa ilang pagmaniho ug maghinay-hinay sa ilang pagpadagan sa highway.
Si Caoagdan nanawagan human sa sunod sunod nga aksidente sa kadalanan sa iyang munisipyo.
Niadtong Martes duha tawo ang namatay sa managlahi nga insidente sa highway didto sa barangay Malasila.
Ang unang insidente nahitabo sa Purok Nangka, Barangay Malasila, Makilala, North Cotabato, kung diin namatay si Benny Sicao Suguilan, 55-anyos, mag-uuma ug molupyo sa Malasila.
Matud pa ni Kapitan Melvin Fortajada, nitabok sa national highway si Saguilan mga alas sais sa gabii, sa dihang nabanggaan kini ug dipasaherong van.
Nagbitbit pa si Saguilan sa bugas nga iyang pinalit sa dihang kini nabanggaan sa van nga gi-maneho ni Walter Paja Capuyan. Gisuwayan kini ug dala sa hospital apan nakabsan kini sa iyang kinabuhi samtang paingon pa sila sa balay tambalanan.
Samtang, patay usab ang usa ka Arnel Taghap Concha, sa dihang nikaliring ang iyang motor human kini na-short sa iyang pag kurbada didto gihapon sa purok Nangka, mga alas-5:00 sa kaadlawon kagahapon.
Sumala pa ni Police Chief Inspector Rick Felongco Medel, hepe sa Makilala PNP, paingon sa Old Bulatukan ang biktima sakay sa iyang Baja nga Motorsiklo nga dunay plakang MC 29475, sa dihang nahitabo angn aksidente.
Ang Lokal nga pangamhanan sa Makilala, nagsige na ug edukar sa mga lumalabay sa Malasila nga mag-amping ug maghinay hinay sa ilang pagmaneho, tungod kay daghan ug kurbada ang dalan, hinungdan sa daghang aksidente ang nagakahitabo sa maong lugar.
NiadtongMartes sa buntag, desinoybe ka tawo ang samaran sa dihang nagbanggan ang pdi pasaherong van ug ten wheeler truch didto sa highway sa Makilala.
Sumala ni Caoagdan, nagbutang na ug libreng kapehanan daplin sa highway aron didto mamahulay ang mga motorista panahon sa kagabhion.
Misaysay si Caoagdan, sagad sa mga madisgrasya naglawig na sa highway sa milabayng lima hangtud otso oras, ug kasagaran gipangkapoy na sya biahe, hinungdan nga iyang gi-butangan ug stop-over.
Ubay ubay na usab ang gibutang nga road warnings, apan murag gibalewala na kini sa mga motorista “Ug ilang tumanon ang among warning, walay disgraaya nga mahitabo, pero daghan nila walay pakialam,” saysay ni Caoagdan.
Apan, bisan unsa pa ang pag-pahinumdum ug warning, daghan gihapon ug mga badlungon nga drayber.-Harold V. Pontongan/NewsLine.ph
