OZAMIZ CITY—Patay ang usa ka sakop sa PNP Maritime Command human nga mahagbong sa dagat ang iyang gimahenong motorsingle.
Giila sa mga sakop sa kapolisan sa Ozamiz ang biktima nga si Patrolman Rosalie Ian Omboy, ulitawo, 30 anyos, lumulopyo sa Sapangdalaga, Misamis Occidental, sakop sa PNP Maritime Command sa Ozamiz ug nadistino sa Tangub City Maritime Boat House.
Sibo sa pasiunang imbestigasyon sa kapolisan nga mga 5:30 sa buntag, Oktubre 25 nagmaneho sa iyang motor single ang biktima gikan sa Tangub City padulong sa Ozamiz City ug samtang gisubay niini ang Diversion Road sa Barangay Malaubang milahos kini sa likoong bahin (blind curved) sa dalan hinungdan nga nahagbong sa dagat.
Nakita na lang nga nakulob ang biktima sout ang iyang helmet ug naglutaw sa dagat samtang ang iyang motor ang mga duha ka dupa ang distansiya gikan sa nahimutangan niini.
Dali nga gidala sa tambalan ang biktima apan gideklara kini sa doctor nga dead on arrival.
Gituohan nga ang daghang bun-og sa ulo maoy hinungdan sa kamatayon sa biktima nga posible nga nabunal sa mga dagkong bato.
Narecover gikan sa biktima ang iyang service fire arm nga 9mm pistol ug duha ka cellular phone niini. -Neptalie Batolenio/Newsline.ph
