DAKBAYAN SA DABAW— Gi-aresto sa kapulisan niadtong Huesbes, Oktobre 23, sa Mactan International Airport, ang Mayor sa Clarin Misamis Occidental, human kini gi-akusahang namukbok ug masahista.
Sumala sa taho sa kapulisan, pasakay na unta si Clarin Mayor David Navarro sa alas 4:00 sa hapon nga biahe sa eroplano, sa dihang gisikop kini sulod mismo sa airport.
Sumala sa blotter sa kapulisan, magpamasahe kuno si Navarro didto sa Fuente Osmeña Circle mga alas 11:00 niadtong Mierkules sa gabii, ug sa dihang gibalibaran nga wala nay babayeng masahista, nasuko ang mayor ug gibukbok ang lalaking masahista nga si John Duenas,
Matud ni Duenas, mireklamo ang usa ka masahista tungod kay gipugos kini sa mayor nga dulaan ang iyang kinatawo.
Gisumitir na sa kapulisan ang CCTV footage sa panghitabo, ug makita kuno nga gisumbag ni Navarro si Duenas sa tiyan.
Apan, hugot nga gipanghimakak ni Navarro ang maong akusasyon, gani matud niya “puro kini tuno-tumo.”
Atol sa interbyu sa mga reporters kaniya, gisaysay ni Navarro “ako ra man syang giwakli.”
Nagdumili paghatag ug dugang komento si Navarro, kay matud pa-hulaton niya ang iyang Abogado.-ezc
