DAKBAYAN SA DABAW (Hunyo 13) — Nagpaabot pa si Davao City Mayor Sara Duterte sa resulta sa imbestigasyon nga ginahimo sa Davao City Police Office may kalabutan sa pagpusil patay kang Talandang Brgy. Kapitan Reynaldo Dumagan.
Kini, human matud pang misaad si PSSupt. Alexander Tagum, City Director nga ilang paspasan ug tutukan ang imbestigasyon arun nga masayran ang motibo ug matumbok kinsay nagpaluyo sa pag ambush sa kapitan.
Sumala sa Mayor, personal niyang naka istorya ang pamilya ni Kapitan Dumagan, sa iyang pagbisita sa haya niini niadtong Dominggo, June 10, 2018 sa Brgy. Talandang Tugbok.
Pipila sa mga gipangstorya sa pamilya sa Mayor nga possibling rason sa pagpatay, una ang pagka strikto niini pagpatuman sa anti criminality ug anti illegal drugs sa ilang lugar, ikaduha; ang may kalabutan sa fake facebook account matud pa niini kung diin didto gipang post ang mga death threats una siya gipatay. Ikatulo, ang pagka dikit niini sa mga sakop sa New Peoples Army ug ang ika upat ang may kalabutan sa gipatay nila nga silingan.
Apan, wala na kaayo gisaysay pa sa mayor ang pipila ka mga detalye niini, ug suma kaniya, magpaabot na lamang siya sa final result sa imbestigasyon sa kapulisan.
Sa karun, wa pay nakuhang testigo ang kapulisan sa maong kaso samtang padayon ang ilang pagkontak sa pamilya alang sa dugang pa nga mga impormasyon.-Rey Nuñez/NewsLine.ph
