DAKBAYAN SA DABAW (Nobembre 1) — Usa ka pinasahi nga selebrasyon sa adlaw sa mga patay ang ginahimo sa pipila ka mga membro sa kulto didto sa M’lang, North Cotabato, ang mga membro sa kulto nagpangita sa bukog sa usa ka gibantog nga isog ug idlas nga lider nga adunay anting-anting.
Sumala sa taho, daghan na ang mibisita ug nangita sa lubong ni Feliciano Lucez, alyas “Kumander Toothpick” , didto sa minteryo sa M’lang, aron manguha sa bukog sa namatay nga lider.
Si Kumander Toothpick, usa sa mga gibantog nga idlas ug dili kuno makita nga lider sa kulto niadtong dekada setenta. Siya ang gikahadlukan sa mga bandidong Muslim sa North Cotabato ug sa Maguindanao, tungod sa iyang birtud nga dili makita kung siya mo-ataki sa kalaban.
Sumala ni Hernan Dapudong, administrador sa minteryo sa M’lang, inig angat na sa kalag-kalag, daghan ang mangita sa lubong ni Kumander Toothpick.
“Gusto lang nila mabilan-an ug naa pa ang lubong ni Luces, naa pa ba ang iyang mga bukog”” saysay ni Dapudong.
“Ako silang gina-ingnan nga gibalhin na ang mga bukog ni Luces kay gi-ayo man ang minteryo, ug gibalhin na sab ang iyang mga bukog.”
Si Kumander Toothpick namatay sa engkuentro tali sa mga bandido didto sa Upi, South Cotabato niadtong 1982.
Nagtuo si Dapudong nga gustong makakuha ug bukog ni Kumander Toothpick ang pipila ka mga membro sa kulto aron himoun kining anting-anting, tungod kay nagtuo sila nga kuyaw ug pawer ang anting-anting sa namatay nga lider.
Daghan ang nagtuo nga si Kumander toothpick, gi-armasan sa mga sundalo aron mo-atbang sa kabangis sa mga bandidong grupo niadtong dekada ’70 , gani daghan ang mahinumdum sa iyang abilidad sa pakig-away
Sumala ni Vicente Makiran, 65, anyos, usa ang iyang pamilya sa nakakita sa kahanas ug kaabtik ni Kumander Toothpick ug gani, nakabantay sab sila nga dunay mga panahon nga mawala sa ilang panan-aw si Toothpick ug kalit lang usab kining mopakita sa ilang atubangan,
Misaysay si Makiran nga si Toothpick, ilado kaayo sa Maguindanao ug North Cotabato nga mo-ataki sa iyang kalaban nga mag-tiniil ug makig-sangka gamit ang iyang Garand ug magbitay sa iyang li-og ang usa ka anting-anting.
“Kung moatubang siya sa mga Muslim nga bandido, magtiniil, unya maskiin ug paulanan siya ug bala, dili gyud kadulot,” matud pa ni Makiran.
Nagtuo ang mga sumusunod ni Kumander Toothpick nga wala niya nasuot ang iyang anting-anting sa dihang sya nakig-engkuentro sa Upi, hinungdan nga siya namatay,
Si Toothpick gilubong uban sa panteon sa iyang asawa nga si Norma. Apan ang ilang mga bukog gibalhin sa “Common” nga lubnganan sa bag-ong minteryo sa M’lang-Edwin O. Fernandez/NewsLine.ph
