LUNGSOD SA LAMITAN, BASILAN —– Nagsangka ang usa ka membro sa Moro National Liberation Front (MNLF) batok sa usa ka membro sa Moro Islamic Liberation Front (MILF) didto sa barangay Parangbasak didto sa lungsod sa Tipo-tipo dinhi sa probinsya sa Basilan, kaganihang buntag.
Ang away tali sa membro sa MNLF ug MILF misangpot sa kahadluk sa mga residente tungod kay naglabanay na ang ilang mga grupo.
Ang panag-away sa duha misangpot sa kamatayon ni Shein Docol, 21 anyos ug usa ka miembro sa MNLF.
Nasuta sa kasundaluhan ug kapulisan nga ang mipusil-patay kang Docol usa ka miembro sa MILF nga wala pa mailhi hangtud karong panahuna.
Ang duha ka nag-away mga miyembro sa MNLF ubos ni Rajan Abdurahman ug sa MILF nga membro sa Usong Ugong.
Apan, sumala ni Hadji Samad Atain Ahaddin, ang membro sa Moro Islamic Liberation Front Coordinating Committee on the Cessation of Hostilities (MILF-CCCH) sa Basilan, ang kaso sa duha walay kalambigitan sa tibouk organisasyon.
Tungod sa insidente sa Bacud, Tipo-tipo, daling gisuspenso ang klase sa duha ka eskuelahan sa Parangbasak ug gipapauli gilayon ang mga estudyante.
Matud ni Samad, ang kagubot nag-ugat niadtong Agosto 28, 2022, sa dihang gikunpiska sa mga meimbro sa MILF ang illegal nga druga ug armas gikan sa kamot ni Rey Disala, nga usa ka membro sa MNLF.
Ang mga nakunpiskang druga ug armas, gitunol gilayon sa membro sa MILF sa Tipo-Tipo Municipal Police Station.
Matud ni Samad walay laing motibo ang MILF sa dihang ilang gikunpiska ang illegal nga druga ug armas, tungod kay nagsuporta lang kini sa programa sa gobierno batok sa illegal nga druga nga nakasulod sa ilang area of responsibility.
Human madawat sa militar ang taho mahitungod sa panghitabo dayon kini nagpadala og usa ka Platoon nga gipangunahan ni 1Lt Torres gikan sa 18th Infantry Battalion aron sa paghupay sa nagpadayong panagbangi tali sa duha ka grupo.
Miadto usab sa sa lugar ang mga personahe sa Lamitan City Police personnel nga gipangunahan ni PLtCol. Arlan Delumpines aron sa ipaniguro nga luwas ang mga civilian.
Mipatunga ang barangay kapitan sa Parangbasak ug nakig-alayon kini sa mga lideres sa MNLF ug MILF alang sa malinawon nga panagsabot aron mahunong na ang engkuento ug mag-istorya nalang ang duha ka grupo ug aron dili na madamay ang mga civilian.-Grace Alconaba
