DAKBAYAN SA DABAW — PA-IMBISTIGAHAN sa Talomo pulis ang kamatayon sa usa ka menor de edad nga gipatay sa wala pa mailhing mga suspetsado niadtong Biernes sa ala 1:15 sa hapon.
Gimandu ni Talomo Police Chief Lt. Ronald Lao nga imbistigahan ang kamatayon sa 15-anyos nga bata, human kini gipusil patay didto sa Pag ibig Drive, Dumoy, ning dakbayan.
Wala nganli ni Lao ang bata tungod kini menor de edad, apan iyang gibutyag nga sulod-gawas na kini sa prisohan.
Naghulat ang biktima sa iyang amahan, sa dihang kalit may miduol kaniya nga duha ka lalaki ug ang usa niini mupusil sa bata.
Nakakuha ang Scene of the Crime Operative (SOCO) ug usa ka basyo sa bala sa .45 nga pistola nga gituohang maoy gigamit pagpatay sa biktima.
Gimandu gilayon ni Lao nga imbistigahan ang maong insidente.
Gisaysay ni Lao, dili pa lang dugay, midangop sa Women and Children Protection Desk ang amahan sa biktima aron ipa custodiya kini sa pulis, apan, human sa pila ka oras, gipapauli kini human gi-counselling ug gitambagan ang nahisgutang bata.
Sumala ni Lao, nalambigit ang biktima sa mga kasong pagpangawat ug mga ginagmayng krimen sa Ecoland ug sa Dumoy.
Niadtong Septiembre 2019, gipagawas sa Bahay Pag-asa ang bata human kini gi-rehab sa sulod sa unom ka bulan aron matabangan kini nga magbag-o , apan sumala pa sa mga silingan ug kapulisan wala gayud kini nag-bag-o.
Nasubo ang kapulisan sa gidangatan sa bata, og hangtud karon padayon ang imbestigasyon sa Talomo aron mailhan kung kinsa ang mipatay sa bata.
