TANGUB CITY, Misamis Occidental—Gitugutan na sa local nga pangagamhanan niining siyudad ang mga bata nga makasulod ug makasuroy aron sa pagtan-aw sa Christmas Symbols.
Base sa gipagawas nga Executive Order # 106 ni Mayor Jennifer Tan ang mga bata nga nagpangidaron of 3 anyos pataas mahimo na nga makasulod sa nahimutangan sa Christmas Symbols.
Gilatid sa maong Executive Order nga makasulod ang mga bata basta anaa ang mga ginikanan nga mogiya niini ug sa pagsunod sa health protocols, pagsul-ob og facemask ug sa pag-fill-up sa health declaration form.
Gipadayag ni Mayor Tan nga ang nakatukmod kaniya nga mohimo sa maong executive order mao ang pagtugot usab sa Department of Health (DOH), Department of Interior and Local Government (DILG), Department of Tourism (DOT)human nga gihangyo sa Tangub City COVID-19 Taskforce.
Una niini giulan og daghang hangyo ang Tangub City gikan sa mga tawo nga tugutan ang ilang mga anak nga makalantaw sa Christmas Symbols.
Gidugang sa mayor nga nahimo kining posible tungod kay ang Tangub City anaa man ilalom sa Modified General Community Quarantine (MGCQ)nga mahimo na nga makagawas sa balay ang mga bata basta anaa ang ilang mga ginikanan.
Ang Christmas Symbols Festival sa Tangub ang anaa na sa ika 28 ka tuig ug karong tuiga nagdala sa tema nga “Christmas Village” nga naandan na nga suruyan sa katawhan matag-bulan sa Disyembre.
Karong tuiga, tungod sa nasinati nga Coronavirus disease (COVID-19) pandemic limitado ang makasulod matag-gabii nga adunay gidaghanon nga tulo ka libo, diin 2,000 niini ang online booking samtang ang usa ka libo ang walk-in.
Ang tanan nga mosulod kinahanglan nga mag-obserba sa health protocols, pagsuod og facemask ug pag-obserba sa social distancing. –Neptalie Batolenio
