DAKBAYAN SA SUGBO – Ang mga mining company sa Central Visayas nagsugod na sa pagpanghatag og suporta ngadto sa mga apektadong komunidad sa coronavirus disease (Covid-19) pinaagi sa ilang gi-realign nga Social Development and Management Program (SDMP) funds.
Ang gi-realign nga pondo sa SDMP gikan sa mga nagkalain-laing mining company sa Region 7 niabot na og kapin P21 milyones, matud pa sa press release gikan sa Mines and Geosciences Bureau (MGB) – 7 nga nadawat sa NewsLine kagahapon, Abril 28.
Niadtong Abril 1, ang MGB niluwat og mga guideline alang sa realignment sa mga wala nagamit nga pondo sa SDMP sa miaging tuig nga gikarga og apil sa 2020 Annual SDMP budget.
Ang mga rehiyonal nga buhatan sa MGB gi-authorize usab nga mo-aprubar sa mga SDMP fund realignment alang sa mga programa, proyekto, ug mga kalihokan nga makatabang sa pagbatok sa negatibong epekto sa Covid-19 sa mga komunidad.
Sumala pa ni MGB-7 Director Loreto Alburo, ang wala magamit nga pondo sa miaging tuig maoy unang gamiton usa pa magamit ang 2020 SDMP funds.
Ang Carmen Copper Corporation (CCC) sa Toledo City, Cebu mi-realign na sa ilang SDMP nga pondo para makapamalit og mga pagkaon nga ipang apod-apod sa mga lumolupyo sa Toledo ug kasilinganang komunidad.
Dul-an P16 milyones ang gigahin sa CCC alang sa kapin 8,000 ka mga pamilya sa 17 ka mga barangay sa Toledo City lakip na ang mga person with disability (PWDs) ug mga frontliner.
“Daghan nang kausaban ang nahitabo. Panahon na nga magkahiusa. Ang Covid-19 dili malupig sa usa lamang ka indibidwal,” ingon ni CCC president ug CEO Roy Deveratura.
Ang Solid Earth Development Corporation (SEDC) sa San Fernando, Cebu migahin usab og kapin P400,000 gikan sa ilang SDMP nga pondo para ipamalit og pagkaon alang sa mga lumolupyo ug frontliner sa 13 ka mga barangay sa lungsod ug sa kasikbit nga munisipyo sa Pinamungajan.
Ang SEDC nanghatag usab og mga personal protective equipment (PPE), disinfectant, sakyanan, ug kapuy-an sa ilang mga empleyado nga nagpadayon og trabaho.
Sa laing bahin, ang JLR Construction and Aggregates Inc. nakagasto na og dul-an P2.7 milyones para sa pagtabang sa mga panimalay ug sa mga nawad-an og trabaho sa lungsod sa Minglanilla ug sa mga dakbayan sa Naga, Talisay ug Mandaue.
Sa probinsiya sa Bohol, ang Bohol Limestone Corporation migahin usab og P1 million para sa pagkaon nga ipanghatag ngadto sa kapin 6,000 ka panimalay sa lungsod sa Garcia-Hernandez.
“Mapasalamaton ko sa inisyatibo ug paningkamot sa mga mining company nga makatabang sa komunidad ug sa ilang mga empleyado sa panahon sa krisis,” sulti ni Alburo. (LBG)
