MGA 30 ka Pilipino midonar og dugo atol sa usa ka “blood donation drive” didto sa Rome niadtong Mayo 3, ang Philippine Embassy sa Italy nag-ingon.
Ang “blood donation drive” gipasiugdahan sa Associazone di Donatori Volontari di Sangue La Rete di Tutti (La Rete di tutti
OdV) alang sa pagtabang sa kampanya batok coronavirus disease (Covid-19) sa Italy, matud pa sa taho nga gi-post sa website sa
Department of Foreign Affairs sa Miyerkules, Mayo 6.
Si Felice Di Iorio, pangulo sa La Rete di tutti OdV, nag-ingon nga dako kaayong tabang ang pagdonar og dugo, sanglit nagkagamay na ang supply sa dugo sa mga blood bank sa Italy.
“The blood donation is a huge effort to help in the Covid-19 emergency. Since the start of the Covid-19 outbreak, Italian
health authorities have been calling for blood donors as blood banks are experiencing low supply of blood caused by
the health crisis,” sulti ni Di Iorio.
Si Iorio nagpaabot usab sa iyang pasalamat ngadto sa mga Pilipino sa Italy pinaagi kang Philippine Ambassador Domingo
Nolasco.
Ang kalihokan gipahigayon uban sa pakigtambayayong sa iPARAMEDICI, usa ka organisasyon nga gitukod ni Dindo
Malanyaon ug kasagaran Pilipino ang mga miyembro.
Dul-an siyam ka tuig nang nakig-uban ang iPARAMEDICI sa La Rete di tutti OdV ug gibana-banang 300 na sa ilang mga miyembro ang nakatampo sa mga blood donation nga
kalihokan.
Sa kasamtangang panahon, aduna na’y 29,315 ka mga tawo ang namatay sa Italy tungod sa Covid-19.
Bisan usa sa mga nasud sa Europa nga labihang naigo sa virus, ang Italy karong semanaha mipaluag na sa limitasyon sa paglihok-lihok sa ilang mga katawhan. (LBG)
