OROQUIETA CITY, Misamis Occidental—Aduna nay bag-ong PNP provincial director ang lalawigan human nga nga ma-promote si outgoing Provincial Director Colonel Danildo Tumanda isip bag-ong Regional Chief of Staff sa Region 10.
Ang bag-ong provincial director mao si Police Col. Rolindo Suguilon, PNPA Class 95. Si Suguilon, sa wala pa madistino sa Misamis Occidental siya ang Provincial Director sa probinsiya sa Lanao del Norte.
Si Police Colonel Wilbur M. Salaguste, Chief of Regional Personnel & Records Management Division, PRO 10 mao ang nagdumala sa Changed of Command Rites, Disyembre 14, 2020 sa Camp Lt. Lucas Naranjo sa Lower Lamac, Oroquieta City.
Sa iyang mensahe, gipasalamatan ni Suguilon si PNP Director General Debold Sinas ug si PNP Regional Director Pol. BGen. Rolando Anduyan sa pagsalig ug kompiyansa niini sa pagdumala sa kapolisan sa Misamis Occidental.
Gidugang ni Suguilon nga usa ka dakong hagit alang kaniya ang dili hilabwan nga pagdumala sa iyang classmate nga si out-going provincial director Colonel Tumanda kinsa na promote isip PNP 10 Chief of Staff.
Gisaad usab ni Suguilon nga iyang ipadayon ang mga maayong plano ug programa ni Tumanda ug iyang dugangan sa mga maayong buhat nga palambuon pa ang pamolis sa lalawigan.
[“In my assumption of office, I bring along with me the standing orders from the chief of the Philippine National Police, Pol/Director General Debold Sinas to continue our war against illegal drugs, criminality and corruption, to strengthen our internal security operation, enhanced inter-agency collaboration and to maintain a stronger police and community partnership.”]
“Sa akong paglingkod, uban kanako ang mando gikan kang PNP Chief, Police Director General Debold Sinas nga ipadayon ang pagpakigbatok sa illegal nga droga, kriminalidad ug kurapsiyon aron mapalig-ong ang internal security operation, pagpalapnag sa pagpakiglambigit sa ubang mga ahensiya ug sa pagmintina sa hugot nga pagpakigtambayayong sa kapolisan ug sa komunidad”, pahayag sa bag-ong PNP Provincial director sa Misamis Occidental. –Neptalie Batolenio
