DAKBAYAN SA DABAW, Mindanao— Nagbahad si Moro National Liberation (MNLF) chairperson Nur Misuari , nga iyang bitayon sa publiko ang mga membro nga molapas sa ilang balaud ug mapamatudan nga nalambigit sa ielagl nga druga.
Sa Bag-o palang gipahigayon nga tigum atol sa ika-50 nga kasumaran sa MNLF dinhi sa dakbayan, niadtong Marso 18, namulong si Misuari atubangan sa iyang libuan ka membro ” Atong suportahan ang palisiya sa goberno batok sa ilegal nga druga, atong bitayon sa publiko ang mapamatud-an nga misupak sa pamalaud sa MNLF, tungod kay kana supak sa atong palisiya.”
Una niini, namulong si Philippine Drug Enforcement Agency (PDEA) director general Aaron Aquino, nga kadaghanan sa mga barangay nga dili aktibo sa kampayan batok druga nagagikan sa Autonomous Region in Muslim Mindanao (ARMM) gani, dili aktibo ang ilang Barangay Anti-Drug Abuse Councils (BADAC).
Matud pa ni Aquino, ilang gidudahan nga ang mga barangay walay BADAC dunay kalambigitan sa ilegal druga.
Tungod niini, naglisod ang PDEA ug ang mga operatiba sa governo, sa paglusad ug paglimpyo sa mga barangay nga gikaduhang aktibo sa ilegal ang druga.
Atol sa tigum, nanaad si Misuari, nga iyang gub-on ang mga langyaw nga moguba sa panaghi-usa sa mga membro sa MNLF.
“Kanang mga langyaw nga naniktik ug nagdala ug kagubot sa atong grupo, maoy nakasiak, ug nagdala ug kagubot, nga gikan sa Indonesia, Malaysia, Saudi Arabia, Morocco ug Iran, o asa man nga nasud sa kalibutan, sila ang atong gub-on og pahawaan,” namulong si Misuari.
Matud pa ni Misuari, dili batasan sa MNLF ang moguba sa komunidad, apan naay pipila ka grupo nga niguba sa ilang pangalan, gani, ang uban kanila nalambigit na sa pag-pangidnap.
Masubo usab si Misuari, kay adunay pipila ka mga tao nga dayon molambigit sa tanang Muslim, sa salaud nga hinimuan sa pipila.
Gani, gi-aghat ni Misuari ang tanang membro sa MNLF nga makig-alayon sa mga otoridad nga nagbantay sa kadagatan sa Pilipinas ug Indonesia aron walay terorista nga makasulod sa atong nasud.
Si Misuari napiling governador sa ARMM niadtoong September 30, 1996 hantud nga siya naaresto didto sa Sabah, Malaysia niadtong tuig 2000 ug napriso sa Pilipinas niadtong Abril 2008.
Gi-akusahan si Misuari sa pagpangulo sa rebelyon sa Zamboanga, niadtong Septembre 2013 o “Zamboanga Siege”.
Apan, paglingkod ni Presidente Rodrigo Duterte, iyang gitagaan ug temporaryong kagawasan si Misuari subay sa mga pamalaud sa nasud.-Harold V. Pontongan/Newsline.ph
