DAKBAYAN SA DABAW — Tiklo sa operasyon sa San Pedro Police ang usa ka model ug iyang uyab sa dihang napalitan sila ug ‘shabu’ niadtong Martes sa hapon, Hunyo 30, didto sa Purok 8, V. Mapa street, Brgy. 12-B, Bajada, Davao City.
Gi-aresto sa kapulisan ang mag-uyab nga sila si Armando Christopher Macasaet alias perper ug alyas Samantha sa aktong pagpamaligya og usa ka pakete sa gituohang shabu sa kantidad nga 1,000 pesos atol sa drug bust operation.
Sumala pa, modelo sa usa ka prestihiyosong kolehiyo ning dakbayan si Samantha.
Sumala ni Police Major Jack Tilcag alas 5:10 sa hapon gilusad ang operasyon ug sa dihang gidawat na sa suspek ang minarkahang kuarta, dayon kining gidakop sa mga operatiba.
Gawas sa druga nga naa sa kamot sa suspek, nakuhaan pa sila ug walo (8) ka mga pakete sa gituohang shabu nga mutimbang sa 17.5 grams nga nagkantidad ug 245,000 pesos ug shabu paraphernalia lakip na ang usa ka .22 revolver loaded sa upat (4) ka mga live ammunitions.
Sumala ni Tilcag dugay na nila gimonitor ang kalihukan sa mga suspetsado ug gani target na sila sa PDEA.
“Notado na sila sa ilang mga transaction sa illegal nga druga, silang duha naa sa directorate for intelligence drugs watchlist,” dugang ni Tilcag.
Kasong paglapas sa RA 9165 Comprehensive Dangerous Drugs Act of 2002 ug illegal possession of firearms.-Reeya Nuñez
