DAKBAYAN SA DABAW — Usa ka konsehal ug 16 ka mga kanhi kagawad sa barangay didto sa Cagayan de Oro City ang mipasaka og petisyon sa korte nga ipahunong ang pagbutang og motorcycle barrier.
Sa taho nga gipagawas sa Philippine News Agency, Gihangyo ni konsehal Reuben Daba og ni Walter Kiunisa, kanhi kagawad sa  Barangay 16 ang korte nga mopanaug ug Temporary Restraining Order (TRO) sa polisiya sa gobierno kabahin sa motorcycle barrier kay matud pa delikado kini ug dili praktikal.
Misang-at sa ilang petisyon si Daba ug Kiunisa niadtong Biernes, ug ang mosyon ni Daba ug Kiunisa gusuportahan sa 16 ka kanhing kagawad sa barangay.
Sa pito ka pahina nga petisyon nga gisang-at sa Regional Trial Court Branch 41, gisaysay ni Daba nga ang protective barrier sa motor dili makatabang sa mga residente nga nagsalig sa pagpamasada sa motor alang sa ilang panginabuhian.
“Mipadangat na sa ilang opinyon ang mga eksperto sa motor nga dili kini safe ug wala pa masulayan, ug kini dugang nga gasto sa mga driver ug sa pasahero,” saysay ni Daba.
Ang pagbutang og barrier sa motor, usa ka patakaran nga gi-aprobahan sa Inter-Agency Task Force on Emerging Infectious Diesase (AITF-EID)- balaud nga dili makatabang sa mga kabus ug magdugang lang sa galastuhon sa matag pamilya nga naay motor kay mogasto pa sila,” matud sa nag petisyon.
Apan, gibarugan sa AITF-EID ang ilang desisyon nga gipatuman sugod niadtong Agosto 1, tungod kay kini usa ka paagi nga malikayan ang pagkaylap sa coronavirus-19.
Gisaysay ni Daba ug Liunisa nga ang safety dili mamahimong basihan sa AITF-EID, tungod kay ang mga pampublikong sakyanan daghan man ug pasahero, samtang ang motor usa ra.
Matud nila, magtuyok-tuyok man gani ang hangin sa mga pampublikong sakyanan nga aircon, samtang sa motor magtiayon lang o membro sa usa ka pamilya lang ang mosakay, duha ray mag-istorya samtang nagsakay, samtang sa mga jeep daghan.
Ang mga nagsakay sa motor nag-uban man sa usa ka balay, og gani mag-uban sab sila ug tulog ug kaon, mao nang dili na kuno kinahanglan ang motorcycle barrier.
Si Atty. James Judith, ang abogado sa patisyoner, nag-awhag usab sa ubang grupo nga mopasaka sa ilang petisyon aron mahiusa ang tingog batok sa motorcycle barrier.-Newsline.ph
