LUNGSOD SA TARRAGONA (Hunyo 1 ) — Gisulong ug gisunog sa mga nagpailang sakop sa New People’s Army ang Adam’s Haven Mountain Resort sa Brgy. Ompao, Tarragona, Davao Oriental.
Ang wala paghatag sa tag-iya ug revolutionary tax sa grupo sa New Peoples Army (NPA), ang hinungdan sa maong pagsunog.
Nahitabo ang pagsulong niadtong Mierkules Mayo 30, 2018, alas sais sa buntag kalit matud pang niabot ang gibana-banang byente sais (26) ka mga armado ug nagpailang mga sakop sa New Peoples Army (NPA).
Unang Gipangita ang tag iya sa Resort nga si Engr. Ariel Carmina Mosquera, nga wala niadtong higayona.
Sumala sa taho sa kapulisan, usa sa mga armado mideklara “Mga NPA mi og nganung nagpahimo mo ug stablishminto dri nga wala mo mananghid sa amoa? kaning maong lugara sakop pa sa among area dapat maghatag mo og revolutionary tax kay kami ang gobyerno sa mga kabos”
Human niini gisunog nas mga armado ang usa ka (1) multicab usa ka (1) generator set ug usa ka (1) electric steel cutter. Ilang gipangguba og gipanglangkat ang ubang mga gamit sa Resort.
Human sa insidente yano rang nanglakaw ang mga rebelde, hinuon way gihilabtan sa mga trabahante nga anaa sa resort.
Sa imbestigasyon sa kapulisan sakop sa Tarragona Police Station mukabat sa 600 Thousand Pesos ang nahimong danyos.-Rey Nuñez/NewsLine.ph
