SI KANHING Pangulo Fidel V. Ramos naa sa maayong kahimtang samtang ang tibuok Luzon gipaubos sa enhanced community quarantine tungod sa coronavirus disease (Covid-19) outbreak.
Matud pa sa iyang sekretarya nga si Mae Gaffud, ang kanhi presidente naa ra sa iyang panimalay ug kanunay nga nagtan-aw sa mga balita sa telebisyon mahitungod sa epekto sa Covid-19 sa tibuok kalibutan.
“He (FVR) is doing fine under strict quarantine,” sumala pa ni Gaffud sa iyang text message nga gipadala sa mga tigbalita kagahapon, Abril 22. “He passes the day watching the news and documentaries.”
Dugang pa ni Gaffud, si Ramos, sama sa kadaghanan, gilaay na usab sa pagpuyo sa balay ug nagpanikad nang mobalik sa iyang trabaho.
Ang mga tigbalita sa Malacañang, nga nag-cover kang Ramos gikan 1992 hangtud 1998, makigkita unta kaniya niadtong Marso 17, apan wala kini madayon tungod sa Covid-19 pandemic.
Si FVR nailhan sa iyang pagkakugihan isip presidente sa nasud, secretary sa National Defense, ug sundalo ug opisyal sa Armadong Kusog sa Pilipinas (AFP).
Sa edad nga 92, si Ramos motrabaho lang gihapon ug kanunay nga moadto sa iyang opisina sa Ramos Peace and Development (RPDEV) Foundation Inc. sa Makati City.
Si Gaffud nagkanayon nga kanunay silang magestorya ni FVR pinaagi sa video call ug dili kini malimot sa pagpahimangno kaniya nga magpuyo sa balay.
“He never fails to remind me to make sure to stay at home. I am sure this is also his message to us all. Let’s all stay home and flatten the curve! We hope to see you soon!” sulti ni Gaffud. (LBG)