ANG LAND Transportation Franchising and Regulatory Board (LTFRB) sa Eastern Visayas mihatag og special permit sa 486 ka mga public utility vehicle (PUV) nga makadagan sa panahon sa kwarentina.
Si Veronica Reposar, ang hepe sa LTFRB-Eastern visayas Transportation Development Office, nag-ingon nga ilang gilimitahan ang kadaghanon sa mga PUV sa kadalanan sanglit naa pa ubos sa modified general community quarantine ang tibuok rehiyon.
Matud pa ni Reposar, ang LTFRB regional office nangdawat og mga online application para special permit sukad Mayo 5, apan malangan ang ilang pagpanghatag niini tungod sa nagkalain-laing mga hinungdan.
“It takes time before we issue a special permit through online application. Some have been submitting unclear copies of documents while some have outdated registration with the Land Transportation Office. We have to consider a lot of things in our evaluation,” sulti ni Reposar sa mga tigbalita karong Biyernes, Mayo 22.
Dugang ni Reposar nga ilaha unang gihatagan og prayoridad sa paghatag og special permit ang mga sakyanan nga gipanag-iya sa mga transport cooperative.
Ubos sa “new normal” sa pampublikong transportasyon, ingon ni Reposar nga gikinahanglan ang striktong pagpatuman sa pagsul-ob og face mask, physical distancing sulod sa PUV, “regular disinfection” sa sakyanan, ug “no physical contact” sa pagbayad sa plete.
Ang Inter-Agency Council for Traffic (IACT) maoy gitahasan nga mobantay sa mga kalapasan sa sa “travel protocols.”
Ang IACT gilangkuban sa LTFRB, Land Transportation Office (LTO), Highway Patrol Group (HPG), ug mga traffic enforcement unit sa mga lokal nga kagamhanan. (LBG)