DAKBAYAN SA KIDAPAWAN — Sukad Enero ning tuig hangtud Hunyo, nitala na og 407 ka kaso sa Dengue dinhi sa probinsya sa North Cotabato, tulo niini ang namatay tungod sa komplikasyon.
Sa taho nga gipagawas sa Integrated Provincial Health Office o IPHO Cotabato, ang nagkakaso sa dengue gilangkuban sa gamayng bata hangtud 93-anyos.
Duha ang namatay sa lungsod sa Makilala ug usa usab sa lungsod sa Mlang tungod sa komplikasyon.
Base sa listahan sa IPHO, ang mga lungsod nga mitala ug daghang kaso gilangkuban sa Matalam-42; sa Kidapawan City-40 ug sa Libongan-40.
Sa pagkakaron, wala pa nahuman ang clustering sa mga kaso, apan padayon ang imbistigasyon nga gihimo sa IPHO tungod sa gikatahong trese (13) na usab ka kaso sa barangay Ginatilan, sa lungsod sa Kidapawan, niadtong milabayng simana.
Tungod niini, nagnawagan ang IPHO sa katawhan nga mag-amping labi karon nga ting-ulan na usab.
Gi-awhag usab ang katawhan nga siguraduhon nga limpyo ang ilang palibot ug walay mga butang nga puede pondohan ang tubig , aron walay ma-itlogan ang lamok.-Newsline
