DAKBAYAN SA DABAW (Hunyo 16)— Usa ka Overseas Filipino Worker sa nasud Kuwait gi-live video sa iyang amo sa dihang iya kining nasakpan nga naay kaubang Arabo sa sulod sa iyang kuarto niadtong Biernes sa gabii.
Sa usa ka video nga gi-publish sa OFW community, masabtan amo nga babaye usa ka Filipina nga nakabana ug Arabo, tungod kay nag-tinagalog kini samtang iyang gikasab-an ang iyang katabang.
Sumala sa amo, nagsige sila ug tawag sa katabang ug nagpadala ug mensahe sa iyang cellphone apan igo ra daw kining basahon ug dili gyud motubag, butang nga ilang gikabalaka, maong midali sila ug pauli sa ilang balay.
Nasubo kuno ang iyang amo tungod kay, gihimo sa OFW ang butang nga hugot gibawal sa ilang nasud, gani ang lalaki nga kauban sa OFW silingan ra usab nila.
Nagyawyaw ang amo kay murag kaila nila ang bana sa kabatang, nawad-an na kuno siya ug pagsalig.
Nagsige ug pangayo ug pasaylo ang Arabo samtang ang bana sa amo, nagbutyag nga nanawag na daw siya ug pulis.
Sa Kuawait, hugot nga gibawal nga mag-uban sa kuarto ang babaye ug lalaki kung dili sila magtiayon.
Ang insidente nagbunga ug nagkalain-lain nga opinion, gani daghan ang nagkundina sa OFW kay ngano iya kining gihimo nga pamilyado man kini dinhi sa Pilipinas.
Samtang duna usab nasuko sa amo nga babaye nga iyang gi-facebook live ang panghitabo, nga makapasuko sa pamilya sa babaye nga wala kabalo sa sitwasyon.
Aduna usab nagsulti nga unta dili na magpakaulaw ang mga OFW tungod kay tua sila didto aron manarbaho ug dili aron magbinuang.-ezc/NewsLine.ph
