DAKBAYAN SA DABAW — Gikalipay sa mga online sellers ning dakbayan ang kamanduan sa lokal nga panggamhanan nga kinahanglan sila molukat ug bisnis permit sa ilang negosyo.
Si Adam Morrel usa ka manunulat nagsugod sa iyang online food business panahon sa Enhanced Community Quarantine (ECQ) tungod kay iyang nakita nga dunay panginahanglanon sa pagkaon ang katawhan, apan dili sila basta basta makagawas sa ilang panimalay tungod sa hulga sa Coronavirus-19 (COVID-19).
Si Morrel tag-iya sa Adz Kitchen/Kusina ni Adz, nga nahimutang sa Catalunan Grande ning syudad, namaligya og pagkaon nga sagad lutoon sa panimalay ug ang sa mga restaurant lang mapalit, sama sa Spaghetti, binago-ongang baboy, Chicken Alfredo, Lasagña, grilled pork ribs, ug ang paborito sa mga Pinoy nga adodo ug uban pa, nalipay sa awhag sa gobierno.
Matud ni Morrel, nakabayad siya og P500 kay city lang ang scope sa iyang food delivery service.
Ang pagrehistro sa iyang online food business nakahatag kaniya ug dakung pagsalig sa iyang kaugalingon kon ‘confidence’ kay legal na ug lihitimo na ang iyang pagnegosyo.
Si Shine Dalid, usa ka single mom, nalipay usab kay nakahatag kaniya ug legal nga pangalan ang pagrehistro sa iyang negosyo sa DTI ug sa lokal nga panggamhanan.
Nagkuha og permit ang mga online sellers human nihangyo si Mayor Sara Duterte-Carpio nga kinahanglan nga mokuha og bisnis permit ang mga online seller aron ma-monitor sa gobierno ang ilang mga paninda ug kung kini nakapasar ba sa ‘standard’ tungod kay atol sa ECQ walay paagi ang mga ‘buyer’ nga mosubay kung kalidad ba ang mga paninda sa mga online sellers.
Subay sa kamanduan, angayan nga mokuha ug trade name sa Department of Trade and Industry (DTI) ug bisnis permit aron makita sa gobierno ang ilang mga produkto ug kung asa silang lugara naka-base.
Matud ni Arriel Nengasca sa DTI, ang tanang magparehistro sa DTI mobayad og P200 kung ang negosyo anaa lang sa barangay; P500 kung ang iyang negosyo dinhi lang sa dakbayan, P1,200 kung ang negosyo nakaabot sa tibuik rehiyon ug P2,000 kug kini nagadeliver og produkto sa tibouk nasud, ug sila puede mag-apply ug mobayad online, ug hatagan kini sila ug certificate sa DTI nga nakabutang na ang ilang business name ug address ug ang tag-iya sa negosyo.
Tungod kay rehistrado na ang iyang negosyo, “Dili naku maulaw mo post sa akong mga orders ug dili na sab ko maulaw mag storya about sa akong online business, nakadugang gyud sa akoang legitimacy kay nga customers dili na hesitant,” saysay ni Morrel.
Apan siya midungag, “Maskin naa kay DTI dili gihapon legal ang imong negosyo kung wala kay busines permit gikan sa business bureau, mao pagkahuman naku sa DTI naga proces naku karon sa akong business permit.”
“In terms of confidence po, na boost gyud nuon confidence namo, kay somehow naa na pang pakita sa checkpoints pag mag deliver,” dugang ni Morrel.-JAP
