DAVAO CITY – Gipusil-patay sa usa ka suspek niadtong Biyernes sa hapon, Pebrero 7, didto sa Barangay San Raymundo sa Jolo, Sulu, ang usa ka taas nga opisyal sa Department of Education.
Sa interbyu niadtong Sabado, Pebrero 8, kang Brig. Gen. Romeo Juan Macapaz, director sa Police Regional Office-Bangsamoro Autonomous Region, iyang giila ang biktima nga si Sonatria Dandun Gaspar, assistant schools division superintendent sa Sulu.
Sumala ni Macapaz, namatay diha-diha tungod sa daghang mga samad sa ulo ang opisyal sa DepEd.
Si Gaspar, isip assistant schools division superintendent sa Sulu, maoy ikaduhang labing taas nga opisyal sa edukasyon sa probinsiya.
Ang iyang patayng lawas daling gisakay sa barko niadtong Biyernes sa gabii paingon sa Zamboanga City alang sa hinanaling paglubong subay sa tradisyon sa Islam sa paglubong sa patay sulod sa 24 oras human sa kamatayon.
Mogawas na unta si Gaspar sa gikural nga compound sa ilang buhatan sa may dalan Bonifacio sa San Raymundo sa Jolo dihang may usa ka lalaki nga niduol, nibunot og pistola ug gibalik-balik pagpusil sa ulo.
Ang mamumuno daling nakaikyas taliwala sa kagubot tungod sa buto sa armas nga milanog sa dapit.
Matod ni Macapaz nga iyang gimandoan ang mga opisyal sa Jolo Municipal Police Station ug Sulu Provincial Police Office nga magtinabangay sa pag-ila sa nagpatay kang Gaspar aron mataral kin isa korte.
