DAKBAYAN SA DAVAO— Balor P1.7 milyon sa gisuspetsahang shabu ang nakonpiska sa duha ka lalaki nga nasikop atul sa drug buy-bust operation nga gilusad sa Philippine Drug Enforcement Agency sa Bangsamoro Region, daplin lang sa karsada sa Barangay Makir, Datu Odin Sinsuat Maguindanao del Norte niadtong Marso 11 sa hapon.
Giila sa mga operatiba ang duha nga nadakpan nga sila si Nunnga Abtila alyas longhair ug Amir Usman alyas Amier nga pulos taga Datu Odin Sinsuat, Maguindanao del Norte.
Sa interview nga gihimo sa dxMY kang PDEA Agent Datu, gisaysay niini nga si dugay na nilang gibalik-balikan sa lugar aron dakpon si alyas Long Hair apan idlas kini og kaganina lang nila nasakpan.
Sumala ni Datu nakuha gikan sa mga suspeks ang 5 ka medium size nga pakete sa gituohang shabu nga adunay gibug-aton nga 250 gramos ug mobalor og P1,700,000.
Narekober usab ang kwarta nga gigamit sa operasyon isip buy-bust money samtang nakuha usab ang ubang ebidensiya nga dili druga sama sa cellphone ug XRM nga motorsiklo.
Nagtuo ang mga operatiba nga doul lang sa lugar ang gigikanan sa nahisgutang shabu.
Gisusi pa sa PDEA-BARMM ang background sa mga drug suspects.
