DAKBAYAN SA DABAW — Nagmalampuson ang gihimong groundbreaking niadtong Biernes Septyembre 11, sa pagatukurong P3.5-milyon Livestock & Poultry Multiplier Farm for Goat & Free Range Chicken Production sa Municipal Agriculture Production Center sa San Isidro, Davao del Norte.
Gihimo ang groundbreaking sulod mismo sa Municipal Ecological Site sa purok 6 Riverside Sabangan San Isidro Davao del Norte.
Ang pondo nga gikan sa Department of Agriculture ipahigayon ilawom sa KUYA Project kun Key to Unlimited Yeild and Access to livestock & Poultry Project nga usa sa mga proyekto sa Davao del Norte Provincial Government.
Ang KUYA Project usa sa mga proyekto nga gimugna ug gipakusgan ni Governor Edwin Jubahib, tumong niini nga mas pakusgan ang food sufficiency program sa matag lungsod nga sakop sa maong probinsya.
Gipasigarbo sa mga taga San Isidro ang maong proyekto tungod kay dako kinig tabang alang kanila kay sigurado ng dunay makuhaan ug supply sa pagkaon labi na kay daghan ang nakasinati ug krisis karung panahuna tungod sa pandemya nga hatud sa covid-19.Ilang gipasalig nga amomahon ug atimanon ang mga hayop arun nga magmalambuon kini dungan sa katumanan nga mubarog isip “One Team, One DavNor”.
Ang maong proyekto suportado ni San Isidro Mayor Arnel Sitoy ug ni Vice Mayor Baltazar Cuyos kauban ang mga SB Members lakip na sa Municipal Agricultures Office kun MAGRO ss pagpanguna ni Laureano Pintor Jr. MSA.
Ang groundbreaking gitambungan sa mga taga Department of Agriculture XI ug sa mga nagkadaiyang buhatan sa kapitol.-Cheche N. Diabordo/Newsline.ph
