DAKBAYAN SA DABAW (Agosto 31) —- Padayon gihapong gi-istudyuhan sa mga eksperto ang dugay ng gipangandoy nga tulay nga mo-konektar sa syudad sa Davao ug Samal, nga gibana-banang mokabat sa P9-bilyones ka pesos.
Sumala ni Gaudencio “Dean” Ortiz, tigpamaba sa Department of Public Works and Highways (DPWH) XI, anaa pa sa ‘Feasibility Study’ stage’ ang maong proyekto.
Gani, matud pa ni Ortiz, naay kabag-ohan sa plano, tungod kay didto na man kini ipaagi sa pantalan sa Sta, Ana, Magsasay Avevue, dinhi sa Davao diritso sa Isla sa Samal.
“Nabago na kasi ang alignment,” dugang ni Ortiz atol sa gihimong Kapehan sa PIA XI niadtong Biernes, Agosto 31.
Sa kanhing plano, ang tulay magagikan sa propedad sa mga Rodriguez didto sa barangay Sasa ug motugdon kini sa Caliclic, Samal, apan matud pa ni Ortiz, nabag-o na kini.
Gipaklaro ni Ortiz, nga kinig tanan dili pa ang pinal, aduna pay mga kabag-ohan niini tungod kay nag-sige pa ug istudyo ang mga experto aron mapahapsay ang pagtukod sa tulay.
Kung pananglitan mahuman na ang pag-istudyo, ug mamahimong pinal na ang plano, I-implementar ang tulay sa tuig 2020 ug mahuman kini sa 2023.-Harold V. Pontongan/NewsLine.ph
