DAKBAYAN SA OZAMIZ —— Gisugdan na ang multi-million nga urban housing alang sa mga informal settlers ning dakbayan ginamitan sa pondo gikan sa buhatan ni Second District Congressman Henry S. Oaminal.
Si Oaminal nga usa sa mga Deputy Speakers sa 18th Congress, nagbutyag nga nasugdan na ang proyekto ug nakasabot na usab ang ubang mga apektadong pamilya ug temporaryo silang mipuyo sa usa ka luna, samtang ginahimo pa ang ilang pabahay.
Matud ni Congressman Oaminal, gipondohan sa iyang buhatan ang proyekto nga giduso sa lokal nga panghamhanan sa Ozamiz aron matukod ang modernong pinuy-anan alang sa mga walay balay nga una nang gilista sa Municipal Social Services and Development Office.
“Tanang pondo nga gigamit og gamiton alang sa akong distrito miagi sa proseso ug ang mga proyekto nga ilang gihangyo akong gipaningkamutan nga mapondohan sa nasyonal nga panggamhanan,” saysay sa Congressman.
Gani, gibutyag ni Oaminal nga dinay 14-ka pamilya nga naapektuhan sa proyekto sa Barangay Lam-an sa Ozamiz, apan, usa nalang kuno ang nagmagahi ug hatag sa iyang pagtugot sa ilang propedad bisan pa man sa legal nga proseso nga gipatuman.
Ang gipasabot ni Oaminal mao ang pamilya sa usa ka Catherine Neri, nga mikwestyon sa proseso ug mipasaka og apelar batok sa lokal nga panggamhanan kay dili sila gusto nga mopahawa sa ilang yuta.
Matud ni Neri titulado ang iyang 200 kapin ka square meters nga propidad ug dili sila gusto nga mopahawa sa ilang pinuy-anan tungod kay gipanag-iyahan kini sa iyang ginikanan.
Nagpalaban na ang pamilya Neri kang Sagip Party-list Congressman Rodante Marcolita ug sa usa ka grupo sa simbahan ug ila gayud kunong batokan ang matud pa inhustisya nga ilang natagamtaman ug protektahan ang ilang katungod.
Gani, gi-question ni Neri ang writ of possession nga gipagawas sa korte sa Ozamiz ug mipasaka na kini og mosyon aron ma-isyu ang Temporary restraining Order, apan hangtud sa pagsuwat niining balita, wala pa gihapon mogula.
Mipadangat na usab sa ilang kasuko batok kang Neri ang mga taga Department of Public Works and Highways (DPWH) ug sa mga representante sa Korte tungod kaay iya kunong singgit-singgitan ug magsige ug tawag ni Marcoleta kug adunay legal nga dokumento nga ihatag kaniya.
Bisan pa man sa mga serye sa negosasyon aron ayuson ang problema, nagmagahi si Neri ug pirmi niyang i-rason ang suporta ni Marcoleta ug ang usa ka simbahan.
Apan, matud ni Oaminal ” Akong girespito ang ilang katungod, ug ako magtuman lang kung unsa ang nakatakda sa balaud ug ang kamanduan sa Korte- magpadayon man ang proyekto bisan pa man kong anaa sa taas nga korte ang mga protesta ni Neri,” saysay sa Congressman.
“Ako silang gisabot ug ako padayon nga mag agad sa korte, dili ko makig-away nila kay ako man na silang mga silingan ug sip ilang amahan ug abogado- mag agad ko sa legal nga proseso, kay kanang proyekto dili maan alang kanaku, apan sa katawhan sa Ozamiz,“ dugang ni Oaminal.
Adunay mga hunghong-hunghong nga ang pamilya sa usa ka kontrobersyal nga pamilya sa Ozamiz maoy migasto ug mihatag ug suporta kang Neri maong isog kini ug walay laing gipaminawan. Apan, kini una nang gihimakak ni Neri. Newsline.ph
