DAKBAYAN SA DAVAO —Pormal nang mipasaka og kasong Cyberlibel ang boksingero og Senador nga si Manny Pacquiao batok ni pastor Apollo Quiboloy niadtong Martes sa buntag, Septiembre 14, didto sa Makati City Prosecutor’s Office.
Sa usa ka sulat pahayag, gikontra ni Pacquiao ang mga pamulong ni Quiboloy batok kaniya ug nangayo kini og P100-milyon nga danyos ug dugang bayad alang sa iyang abogado, tungod sa paggamit niini sa iyang gahum ug inpluewensya sa pagpakatag og walay kamatuoran nga balita ug inpormasyon kon ‘Fake News’.
“Gituyo niya og gamit ang mga dili insaktnog inpormasyon aron maotro ang panglantaw kanaku sa katawhang Filipino kon ma-‘brainwash’, hugaw-hugawan ang akong pangalan ug reputasyon isip usa ka matinud-anon nga sulugon sa katawhan,” matud ni Pacquiao.
Sa iyang trese (13) ka pahina nga reklamo, gisaysay sa Senador “Siya adunay kaisug sa pagkutlo sa Balaang Kasulatan sa pagpadayon sa iyang mga bakak, nga nagpahisalaag sa iyang panon, ug nakalibog sa publiko, sa pagtapos sa pagkitum sa dungog sa uban.”.
Ang reklamo ni Pacquiao batok ni Quiboloy nag-ugat sa mga pahayag sa pastor sa iyang telebisyon show sa SMNI ug sa iyang mga social media posts, kung diin gisaysay sa pastor nga migahin ang senador og kuarta sa katawhan sa pagtukod sa wala pa nahuman nga Sarangani Sports Training Center.
Gipakita kuno sa pastor nga migasto ang gobierno og P3.5 billion, og migamit kini og mga hulagway sa mga guba nga bangko sulod sa bilding, nga matud ni Pacquiao puros bakak.
Sa Facebook post sa SMNI, mipagawas og opisyal nga pahayag ang mga abogado ni Quiboloy, gisaysay niini nga wala pa silay nadawat ang opisyal nga kopya sa kaso nga gipasaka batok sa pastor.
“Kami mobarog nga ang matag tawo adunay katungd nga magpakisusi, maminaw, ug mokomentaryo sa mga aksyon sa nga opisyal sa gobierno sama ni senador Manny Pacquiao, nga makainterest sa katawhan, sa mga isyu nga adunay kalambigitan sa ilang pagpanerbisyo, angayan usab nga abri si Senador Pacquiao sa mga kritisismo ug kritikal nga pagtimbang-timbang sa publiko sa ilang hinimoan isip usa ka public official,’ matud pa sa pahayag.
Gisaysay usa sa maong pahayag, nga andam motubag sa mga akusasyon ang pastor kung ila nang madawat ang reklamo.-ezc
