Paghatag og pangkisa sa ABS-CBN giduso sa Kongreso

DAKBAYAN SA DAVAO — Giduso ni  House Committee on Ways and Means Chairperson ug Albay 2nd District Representative Joey Salceda  niadtong Martes ang usa ka  balaodnon nga nagtinguhang hatagan ang ABS-CBN og 25 ka tuig nga prangkisa aron subling makasibya.

Matud ni Salceda naklaro na nila nga walay nalapas nga balaud ang nahisgutang istasyon.

Giduso ang House Bill 11252 nagtinguha nga hatagan ang prangkisa sa ABS-CBN nga “magtukod, mag-instalar, mag-operate ug magmentinar sa mga estasyon sa telebisyon ug sibya sa Pilipinas”.

Niadtong 2020, ang House Committee on Legislative Franchises mibotar sa pagdumili sa aplikasyon sa prangkisa sa ABS-CBN.

“Ang Securities and Exchange Commission ug ang Bureau of Internal Revenue, atol sa House deliberation sa ABS-CBN franchise sa miaging Kongreso, nag-certify nga ang franchise grantee wala makalapas sa ownership restrictions ug walay pending tax liabilities,” matod ni Salceda sa iyang pasabot nga nota.

Ang wala pag renew sa prangkisa nahimong hinungdan nga napugos og sira ang ABS-CBN ug kapin 11,000 ka mga empleyado sa tibouk Pilipinas ang nawad-an og trabaho.

Sumala sa magbabalaud,  36% sa mga Pilipino ang nagkuha sa ilang mga balita ug kalingawan gikan sa nahisgutang channel.

Ang halapad nga rehiyonal nga network sa ABS-CBN mao usab ang tinubdan sa mga balita ug mga update sa umaabot nga mga katalagman, nga naghimo sa channel nga hinungdanon unya sa mga estratehiya sa pagkunhod sa peligro sa katalagman sa lokal nga lebel, ”dugang niya.

Si Salceda niingon nga ang ABS-CBN nahimong importanteng tinubdan sa balita sa pipila ka bahin sa nasod, apil ang Albay, ug ang paghatag niini og prangkisa makatabang sa pagpausbaw sa “libre nga merkado sa mga ideya”.

“Kailangan natin ‘yung free market of ideas and of course reporting on events, lalung lalu na sa pananaw patungkol sa kung ano ang nangyayari sa ating bayan,”dugang ni Salceda.

Upat ka susamang mga balaudnon ang gisang-at kaniadto sa House of Representatives sa 19th Congress, apan na  pending pa kini sa House Committee on Legislative Franchises. Sa pipila ka semana nga nahabilin alang sa ika-19 nga Kongreso, si Salceda nagpabiling malaumon sa kahigayonan sa iyang balaodnon nga maaprobahan.

Mismong si kanhi Presidente Rodrigo Duterte ang nagpahungaw sa iyang kasuko batok sa ABS-CBN nga maoy nahimong mitsa sa pagsira niini tungod kay ang anaa sa Kongreso ug sa Senado niadtong mga panahuna ilang mga kaalyado.