DAKBAYAN SA DABAW — Gi-istudyuhan pa sa nasyonal nga panggamhanan ang hangyo sa mga kompanya sa bus nga mobalik na sa ilang operasyon aron makatabang sa mga pamilya sa driver ug conductor nga naapektuhan sa coronavirus disease 2019 (Covid-19).
Sa pakighinabi sa DZBB kang Cabinet Secretary Karlo Nograles niadtong Domingo, gibutyag niini nga gi-istudyuhan na sa Department of Transportation’s (DOTr) ang ilang gitawag nga “calibrated approach” kong pananglitan nga ibalik na ang biahe sa mga bus, ug posible nga pipila lang usa ang padaganon.
Apan, matud ni Nograles, ang mga bus sa probinsya puede lang makabalik og biahe kung mapaniguro niini nga ang mga pasahero luwas sa coronavirus.
“Bantayan usa ni Transport Secretary [Art] Tugade kung unsan natu pagpaniguro nga ang mga mouli sa probinsya walay covid-19 infection,” saysay niini.
Daku usab ug papel ang lokal nga panggamhanan kay sila man ang magdesisyon kung mopasulod ba sila ug mga bus sa ilang lugar ug modawat sa mga mangabot nga mga pasahero.
Ang matag lungsod sa nasud, padayong nagbantay aron dili motaas ang kaso sa covid-19 sa ilang lugar, butang nga gikonsidera sa ilang pagdesisyon, kinahanglan usa nga hugot ang ilang pagpatuman sa mga health protocols sa mga tawo mosulod sa ilang mga lugar.
Niadtong milabayng bulan, gisugdan na ang paghatud sa mga probinsya ang locally stranded individuals (LSIs) ug returning overseas Filipinos (ROFs) ug ubay ubay kanila ang nagpositibo sa swab test pag-abot sa ilang mga lungsod.
Aan, adunay pipila ka mga lungsod ang dili pa andam modawat sa mga LSIs ug sa mga ROFs,
Matud ni Nograles, hinayhinayon pagtan-aw sa panggamhanan ang posibleng pagpabalik sa operasyno sa mga bus, apan, wala pa kini gikatakda.
Mokabat sa 14,000 ka mga trabador nga nawad-an og trabaho tungod sa pandemya ang naghulat nga makauli sa ilang probinsya. Apan, dili sila maka biahe tungod wala pay mga bus paingon sa ilang tagsa-tagsa ka mga lugar.-Winkle Mae Tabuclao/Newsline
