SYUDAD SA Dabaw — Dili kuno angay makadlok ang publiko sa pagsaksa sa kaso sa coronavirus-19 nga mitala ug 2,434 ka kaso niadtong adlawng Domingo.
Sumala ni Harry Roque, ang tigpamaba sa Presidente, nagoul ang Palasyo sa kalit nga pagsaka sa kaso sa covid-19 sa usa lamang kaadlaw, apan iyang gipasabot nga ginahanglan luagan sa gobierno ang ‘quarantine protocols’ aron makasibog na ang ekonomiya.
“Daghan na ug nabalaka sa report maskin kami naguol na sab sa dihang amo kining nadungog, pero dili na angay maluya niini, ipadayon nato ang atong pakigbatok,” saysay ni Roque sa virtual presser niadtong Lunes.
Bisan pa sa pagtaas sa kaso sa Covid-19, ang 94.3 porsyento niini mga mild nga kaso, 0.5 posyento lang ang grabe, samtang 0.1 porsyento ang critical ug 5.1 porsyento ang asymptomatic, saysay ni Roque.
Ang ‘positivity rate’ sa nasud anaa sa 7.3 porsyento ug kini anaa pa sa ‘benchmark’ sa World Health Organization (WHO).
Iyang gipasabot nga walay laing pamaagi ang gobierno gawas sa pag-abri sa ekonomiya aron ma proteksyonan ang mga trabahador sa mga nawad-an ug panginabuhian.
“Kung dili pa natu abrihan, basin ug maskin buhi pa ta mamatay na hinuon ta tungod kay wala kitay trabaho,,” dugang ni Roque.
Nagwarning usab kini nga posibleng ibalik ang Metro Manila sa enhanced community quarantine (ECQ) kung magpadayon ang pagtaas sa kaso niini.
Sa pagkakaron, anaa ang Metro Manila sa general community quarantine (GCQ) hangtud sa Hulyo 15.
Iyang gi-awhag ang publiko nga mag-igmat ug magsunod sa awhag sa Department of Health nga pirmi magsout og face mask, sundon ang physical distancing ug pirming manghugas og kamot.
Dungan niini gipanghimakak ni Roque ang balita nga puno na kuno ang mga hospital sa Manila, sumala niya 63 porsyento lang ang nagamit sa ilang giaandam nga mga katre sa hospital.-Newsline
