DAKBAYAN SA DABAW—— GIMANDUAN sa Korte Suprema ang pamilya sa namatay nga boxing promotor nga si Rodolfo “Rudy” Nazario nga kompletuhon ug hatag ang bayad sa boksingero nga si Luisito Espinosa.
Sa sulod sa 23-anyos nagpadayon ug paabot si Espinosa sa iyang bayad, sa iyang away batok kang Carlos Rios sa World Boxing Council Featherweight Crown didto sa Koronadal, South Cotabato, 23-anyos na ang milabay.
Gipildi ni Espinosa si Rios sa ika-unom nga round sa maong away.
Sa usa ka desisyon, nga dunay petsa Nobiembre 13, 2019, nga migawas lang niadtong Sabado, Enero 18, gimanduan sa Third Division sa Korte Suprema ang pamilya ni Nazario nga bayaran si Espinosa sa mukabat sa USD130,349 kon (P6,517, 450) ug idugang pa dinhi ang 6-porsyento nga interest kada tuig sukad niadtong Mayo 26, 1998
Ang pamilya Nazario, gipangunahan sa iyang asawa nga si retiradong Supreme Court Associate Justice Minita Chico-Nazario.
Sumala sa korte, nadayon ang away ni Espinosa apan wala pa siya bayari sa iyang daug ug gipadayon kining gibalewala sa mga Nazario.
Niadtong Oktobre 16, 1997 , nagkasinabot si Nazario ug Espinosa kabahin sa bayranan, ug sumala sa Korte Suprema, ang kasabutan nagpabilin hangtud karon, bisan 23-anyos na ang milabay, apan, wala pa gihapon nadawat ni Espinosa ang kumpletong bayad.”
Gibutyag sa korte, nga ang pamilya dili responsable sa mga utang, ug ang ilang obligasyon limitado lang sa balor sa propidad nga ilang napanunod pagkamatay ni Nazario.
Si Nazario namatay niadtong Septiembre 24, 2009. Kuyog ni Nazario nga mipirma ang isip tig-garantiya sa premyo si kanhi South Cotabato Governor Hilario de Pedro III ug ang boxing promoter nga si Joselito Mondejar.
Ubos sa ilang kontrata, modawat si Espinosa ug $150,000 (P7.5-milyon) ug aduna gastos sa iyang training nga mokabat sa $10,000 (P500,000).
Apan, atol sa ilang opisyal nga [agtimang ko ‘weigh-in” niadtong Disyembre 5, 1997, mitunol si Nazario ug USD29,000 (P1.4-milyon).
Sukad niadto, wala na nadugangan ang bayad kang Espinosa, nga unta, naandan man sa boxing nga ang boksingero bayaran tanan pagkahuman sa “weigh-in”.
Gibasura sa korte ang kasong batok kang de Pedro ug kang Mondejar.
Kaduha nahimong world boxing champion si Espinosa. Niadtong 2005, nagdesisyon si Espinosa nga moundang na, human sa duha ka sunod sunod nga kapildihan sa iyang away batok kang Carlos Navarro ug Cristobal Cruz.
Sa pagkakaron, nanarbaho isip gym instructor si Espinosa didto sa China.-RSC
