DAKBAYAN SA DAVAO — Usa ka pasahero sa Davao International Airport nga paingon sa nasud sa Singapore ang mitugpa sa prisohan human kini gidakop sa airport polis tungod sa bomb joke niadtong Biernes, Mayo 3.
Sumala sa Davao International Airport Police Station, usa ka 42-anyos nga lalaki ang naa sa Counter 8 sa usa ka airline check-in counter, nangandam nga mosakay sa Flight TR361 paingon sa Singapore, dihang nihimo og bomb joke.
Imbis nga maglinya na aron mosakay sa eroplano , kalit kining miingon “Wala ni mabuak diri Ma’am, bomba lang, joke lang Ma’am, sorry, Ma’am”.
Tungod sa iyang giluatan, dali siyang gipangutana sa customer service agent bahin sa iyang bagahe ug sa iyang tulo ka kauban. Miinsister pa gayud kini nga komedya lang ang iyang gipamulong.
Apan, gialerto sa customer agent ang security sa airport ug daling miabot ang miembro sa Davao International Airport Police Station (DIAPS) ug gidakop ang pasahero tungod sa paglapas sa Presidential Decree 1727, nailhan usab nga Anti-Bomb Joke Law
.Ang dinakpan gidala sa Southern Philippines Medical Center alang sa medical examination ug gibalhin sa Sasa Police Station alang sa temporaryo nga detensyon.
kasong paglapas sa Anti-Bomb Joke Law ang ipasaha batok sa pasahero.
Ang pasahero nga palupad sa Singapore sa presinto sa Sasa police mitugpa.
Kalabot niini, gipahinumdoman ang publiko nga ang Presidential Decree No. 1727 nagpahamtang ug silot nga pagkabilanggo nga dili molapas sa lima (5) ka tuig, o multa nga dili molapas sa kwarenta mil pesos (P40,000.00) sa mga bomb joke.-Paul T. Palacio
