PAMUB-AN sa Philippine Basketball Association (PBA) ang ilang 45th season samtang ang Pilipinas mapadayong gigapos sa coronavirus disease (Covid-19).
Mao kini ang nadesisyonan sa PBA board of governors ug ni PBA commissioner Willie Marcial human sa ilang online meeting niadtong Martes, Abril 7.
Adunay tulo ka conference ang usa ka PBA season ug nagplano ang board nga himuon na lang duha, pero kung molungtad pa og dugay ang kasamtangang sitwasyon sa nasud, basin usa na lang ka conference ang mapahigayon, sumala pa ni Marcial.
“The leaning of the board right now is two conferences. Pero kapag humaba pa ang current situation, baka maging isang conference na lang,” sulti ni Marcial.
Ang two-conference format katapusang gipahigayon sa liga niadtong 2009-10 season sa wala pa nilingkod pagbalik si Chito Salud isip commissioner pagka 2010-11 season.
Ang single-conference tournament parehas sa format nga gigamit sa National Basketball Association, nga mao usab ang gisunod sa Maharlika Pilipinas Basketball League.
Usa ka dula ra ang napahigayon sa karon nga season. Kini mao ang sangka sa San Miguel Beer ug Magnolia sa pagsugod sa liga niadtong Marso 8.
Niadtong Marso 11, gi-anunsyo ni Marcial ang postponement sa mga dula tungod sa Covid-19 pandemic.
Iya dayong gisunod pag-anunsyo ang postponement sa mga practice sa team.
Ang PBA board magtagbo og usab karong Abril 30 aron pagtuki kung unsa nga format ang ilang gamiton karon nga season nga pagasugdan sa Hunyo.
